مودی سرکار کو ایک بار پھر عالمی سطح پر سبکی کا سامنا کرنا پڑ رہا ہے، ایرانی یوریا جعلی شپنگ دستاویزات کے ذریعے بھارت پہنچادیا گیا، بین الاقوامی پابندیوں کی خلاف ورزی پر سنگین سوالات اٹھ گئے۔
رپورٹ کے مطابق آدتیہ برلا گلوبل ٹریڈنگ کا کارگو ایرانی بندرگاہ سے لادا گیا، دستاویزات میں ردوبدل کرکے روانگی کا مقام عمان ظاہر کیا گیا، دستاویزات میں ردوبدل بین الاقوامی قوانین کی کھلی خلاف ورزی ہے۔بھارت کی وزارت کیمیکلز و فرٹیلائزرز پر بھی سوالات اٹھ گئے، وزارت نے ٹریکنگ ڈیٹا، اصل دستاویزات کی تصدیق کے بغیر منظوری دی،اس واقعے کے بعد بھارت کو امریکی پابندیوں کا سامنا بھی ہوسکتا ہے، بھارت پر عالمی قوانین اور ٹینڈر میں بے ضابطگیوں کے بھی الزامات ہیں۔
بھارتی کمپنی آدتیہ برلا گلوبل ٹریڈنگ نے ایران کے جنوبی پارس گیس کمپلیکس میں تیار ہونے والی یوریا کو اسالوئیہ بندرگاہ سے لوڈ کیا، حالانکہ یہ مصنوعات امریکی پابندیوں کی زد میں آتی ہیں، یوریا 7 اپریل کو جہاز پر لوڈ کی گئی، جبکہ بولی کا عمل اس کے کئی دن بعد ہونا تھا، جسے ماہرین تجارتی اصولوں کے خلاف قرار دے رہے ہیں۔ مبینہ طور پر اس عمل سے یہ تاثر ملتا ہے کہ معاہدہ پہلے سے طے شدہ تھا، امریکی پابندیوں سے بچنے کے لیے 26 اپریل کو ایک بل آف لیڈنگ تیار کیا گیا جس میں لوڈنگ پوائنٹ عمان کی سوہار بندرگاہ ظاہر کیا گیا، جبکہ جہاز کی ٹریکنگ معلومات کے مطابق اصل روانگی ایران کی بندرگاہ اسالوئیہ سے ہوئی، بھارتی وزارتِ کیمیکل و فرٹیلائزر نے بغیر مکمل تصدیق کے جہاز کو سوہار، عمان سے روانہ ہونے والا ظاہر کرتے ہوئے لیٹر آف اتھارٹی جاری کیا۔
ماہرین کے مطابق ایرانی پیٹروکیمیکلز، خصوصاً جنوبی پارس گیس فیلڈ سے تیار ہونے والی یوریا، امریکی ادارے OFAC (آفس آف فارن ایسیٹس کنٹرول) کی پابندیوں کے تحت آتی ہے۔ ایسی صورت میں متعلقہ کمپنیوں کو عالمی مالیاتی نظام سے خارج کیے جانے، ڈالر بینکنگ سہولت کی معطلی اور ثانوی پابندیوں جیسے خطرات کا سامنا ہو سکتا ہے۔