جرمنی کے مصروف ترین فرینکفرٹ ایئرپورٹ پر ملیریا کے نایاب پھیلاؤ کے نتیجے میں 6 ملازمین متاثر ہوگئے، جن میں سے 2 افراد ہلاک ہو گئے۔
جرمن محکمہ صحت کے حکام کے مطابق امکان ہے کہ ملیریا پھیلانے والے مچھر کسی طیارے کے ذریعے ایئرپورٹ پہنچے، جس کے بعد جولائی میں اس وبا کا پہلا کیس سامنے آیا متاثرہ تمام 6 افراد ایئرپورٹ کے مختلف شعبوں اور مختلف مقامات پر کام کرنے والے مرد ملازمین تھے ماہرین خون کے نمونوں کا تجزیہ کرکے یہ معلوم کرنے کی کوشش کر رہے ہیں کہ تمام افراد ایک ہی مچھر کے کاٹنے سے متاثر ہوئے یا مختلف مچھروں نے انہیں کاٹا ایئرپورٹ پر مچھروں کو پکڑنے کے لیے جال نصب کردیے گئے ہیں اور پکڑے جانے والے مچھروں کو لیبارٹری بھیجا جارہا ہے تاکہ ان کی نسل اور ممکنہ ماخذ کا تعین کیا جاسکے۔
فرینکفرٹ محکمہ صحت کے مطابق شہر کی عام آبادی کے لیے خطرہ انتہائی کم ہے، کیونکہ ملیریا ایک شخص سے دوسرے شخص کو منتقل نہیں ہوتا بلکہ مخصو ص اقسام کے مچھروں کے کاٹنے سے پھیلتا ہے متاثرہ مچھروں سے متعلق لیبارٹری نتائج آنے میں کئی ہفتے لگ سکتے ہیں۔
جرمنی کے رابرٹ کوچ انسٹیٹیوٹ کے مطابق ملک میں ملیریا کے زیادہ تر کیسز ایسے افراد میں سامنے آتے ہیں جو ملیریا سے متاثرہ ممالک کا سفر کرکے واپس آتے ہیں، جبکہ جرمن ایئرپورٹ پر مقامی طور پر ملیریا منتقل ہونا انتہائی نایاب ہے فرینکفرٹ ایئرپورٹ پر اس سے قبل بھی 2023 میں ملیریا کا ایک کیس سامنے آیا تھا، عالمی ادارہ صحت کے مطابق ملیریا مخصوص اقسام کے مچھروں کے ذریعے پھیلنے والی بیماری ہے اور اس کے زیادہ تر کیسز گرم اور استو ائی ممالک میں پائے جاتے ہیں۔