ملک کے مختلف شہروں میں آٹے کی قیمتوں میں ایک بار پھر اضافہ ریکارڈ کیا گیا ہے، جس کے باعث مہنگائی کے بوجھ تلے دبے عوام کی مشکلات میں مزید اضافہ ہوگیا۔ ادارہ شماریات کی جانب سے جاری کردہ دستاویزات کے مطابق کراچی کے شہری بدستور ملک میں سب سے مہنگا آٹا خریدنے پر مجبور ہیں۔
رپورٹ کے مطابق گزشتہ ایک ہفتے کے دوران کراچی میں 20 کلو آٹے کے تھیلے کی قیمت میں مزید 100 روپے اضافہ ہوا ہے، جس کے بعد تھیلے کی قیمت 2600 روپے تک پہنچ گئی ہے۔ اس سے قبل یہی تھیلا تقریباً 2500 روپے میں فروخت ہو رہا تھا۔دستاویزات میں بتایا گیا ہے کہ لاہور میں بھی آٹے کی قیمتوں میں نمایاں اضافہ دیکھنے میں آیا، جہاں 20 کلو آٹے کا تھیلا 290 روپے تک مہنگا ہوگیا۔ اسی طرح وفاقی دارالحکومت اسلام آباد میں آٹے کے تھیلے کی قیمت میں 93 روپے اضافہ ریکارڈ کیا گیا۔رپورٹ کے مطابق پشاور میں آٹا 150 روپے جبکہ خضدار میں 140 روپے تک مہنگا ہوا۔ راولپنڈی میں 80 روپے اور بنوں میں 50 روپے اضافہ سامنے آیا ہے۔دوسری جانب کوئٹہ میں 30 روپے جبکہ ملتان میں 27 روپے تک اضافے کی اطلاع ہے، جس کے بعد ملک بھر میں اشیائے خور و نوش کی بڑھتی ہوئی قیمتوں پر شہریوں نے شدید تشویش کا اظہار کیا ہے۔
ماہرین کے مطابق گندم کی فراہمی، ٹرانسپورٹ اخراجات اور مارکیٹ میں طلب و رسد کے مسائل آٹے کی قیمتوں میں اضافے کی اہم وجوہات قرار دی جا رہی ہیں، جبکہ شہریوں کا کہنا ہے کہ روزمرہ استعمال کی بنیادی اشیاء کی قیمتوں میں مسلسل اضافہ گھریلو بجٹ کو بری طرح متاثر کر رہا ہے۔