مذاکرات کے اگلے دور کی کوئی تاریخ تاحال طے نہیں کی گئی،ترجمان دفترخارجہ

ترجمان دفتر خارجہ طاہر اندرابی نے کہا ہے کہ امریکا اور ایران کے درمیان مذاکرات کے اگلے دور کی کوئی تاریخ تاحال طے نہیں کی گئی،چیف آف ڈیفنس فورسز کا دورہ ایران اور وزیراعظم کا سہہ ملکی دورہ پاکستان کی امن کوششوں کا حصہ ہے،ہم تہران اور مذاکرات میں فریقین کی پوزیشنز پر تبصرہ نہیں کریں گے،یہ فریقین کے ہم پر اعتماد کا حصہ ہے،میڈیا بھی قیاس آرائیوں سے گریز کرے،مذاکرات انتہائی اعتماد اور خفیہ و خاموشی سے ہو رہے ہیں

ہفتہ وار پریس بریفنگ کے دوران ترجمان دفتر خارجہ کا کہنا تھا کہ وزیراعظم شہباز شریف مدینہ منورہ سے دوحہ روانہ ہو گئے ہیں جہاں وہ امیرِ قطر شیخ تمیم بن حمد آل ثانی سے ملاقات کریں گے جبکہ فیلڈ مارشل سید عاصم منیر گزشتہ روز تہران پہنچے،پاکستان مشرقِ وسطیٰ میں کشیدگی کے خاتمے اور فوری امن کا خواہاں ہے اور اسلام آباد میں امن مذاکرات کے انعقاد کیلئے وزیراعظم نے بھرپور کردار ادا کیا۔ وزیر خارجہ اسحاق ڈار اور ان کی ٹیم بھی اس عمل میں سرگرم رہی، پاکستان کی مؤثر ثالثی اور جاندار سہولتکاری کے باعث جنگ بندی ممکن ہوئی، گزشتہ ہفتے امریکی اور ایرانی وفود نے وزیراعظم اور عسکری قیادت سے ملاقاتیں کیں اور بہترین میزبانی پر پاکستان کو سراہا، عالمی سطح پر پاکستان کی امن کوششوں کو تسلیم کیا جا رہا ہے، وزیراعظم نے حال ہی میں سعودی عرب کا دورہ بھی کیا جہاں سعودی قیادت کو پاکستان کی کوششوں سے آگاہ کیا گیا جبکہ امیرِ قطر، جرمن چانسلر اور اطالوی وزیراعظم نے بھی شہباز شریف سے ٹیلیفونک رابطے کیے۔ مختلف ممالک کے وزرائے خارجہ نے بھی پاکستان کے کردار کو سراہا۔

ترجمان دفتر خارجہ نے کہا کہ 9 اپریل کو اسرائیل کی جانب سے لبنان پر حملوں کی پاکستان شدید مذمت کرتا ہے اور ان فضائی حملوں کو علاقائی امن کیلئے خطرہ قرار دیتا ہے، بھارت کا انتہا پسندانہ ایجنڈا خطے کے استحکام کو نقصان پہنچا رہا ہے، جبکہ پاکستان کشمیریوں کی اخلاقی، سیاسی اور سفارتی حمایت جاری رکھے گا۔ انہوں نے بھارت میں اقلیتوں کے خلاف کارروائیوں پر بھی تشویش کا اظہار کیا اور کہا کہ پاکستان علاقائی امن اور انسانی حقوق کے تحفظ کیلئے عالمی سطح پر آواز بلند کرتا رہے گا۔