تحریک انصاف کے رہنما نعیم حیدر پنجوتھہ کےخلاف سرگودھا کے تھانہ بھیرہ میں بجلی چوری کا مقدمہ درج کر لیا گیا
سرگودھا کی تحصیل بھیرہ میں فیسکو کی ٹاسک فورس نے مبینہ بجلی چوری پکڑ کر صارف کے خلاف مقدمہ درج کرا دیا۔ایف آئی آر کے مطابق فیسکو کے ایس ڈی او محمد عاطف ضیاء کی جانب سے تھانہ بھیرہ میں درخواست دی گئی کہ فیسکو ٹاسک فورس کے ملازمین محمد انور چدھڑ اور محمد عمر نے 10 ستمبر 2026 کو ڈھل کے علاقے میں صارف نعیم حیدر ولد محمد حیات کے بجلی میٹر کو چیک کیا۔رپورٹ کے مطابق موقع پر نصب میٹر مشکوک پائے جانے پر اتار کر فیسکو لیبارٹری سرگودھا بھجوایا گیا۔ ایکسین ایم اینڈ ٹی سرگودھا کی رپورٹ میں بتایا گیا کہ میٹر کی باڈی کے ساتھ مبینہ ٹیمپرنگ کے شواہد ملے، دونوں اطراف کی سیل ٹوٹی ہوئی تھیں جبکہ میٹر کی باڈی بھی کھلی ہوئی تھی۔ایف آئی آر میں مزید الزام عائد کیا گیا ہے کہ اضافی تار لگا کر میٹر کے تھمبل کو مبینہ طور پر شَنٹ کیا گیا تھا اور اس طریقے سے بجلی چوری کی جا رہی تھی۔پولیس نے فیسکو حکام کی درخواست پر صارف نعیم حیدر کے خلاف دفعہ 462-I کے تحت مقدمہ درج کرکے کارروائی شروع کردی ہے۔