نیپال کے ضلع راسووا میں شدید سیلاب نے بڑے پیمانے پر تباہی مچا دی، جس کے باعث متعدد دیہات زیرِ آب آگئے جبکہ مختلف علاقوں میں پیش آنے والے واقعات کے نتیجے میں کم از کم 8 افراد جاں بحق ہوگئے۔ سیلابی پانی نے کئی علاقوں کو اپنی لپیٹ میں لے لیا، جس سے شہریوں کو شدید مشکلات کا سامنا ہے اور معمولاتِ زندگی بری طرح متاثر ہوئے ہیں۔
خبر ایجنسی کے مطابق شدید بارشوں اور سیلاب کے باعث ضلع راسووا میں سڑکیں، پل اور بجلی کا نظام متاثر ہوا ہے، جبکہ متعدد علاقوں کا دیگر علاقوں سے زمینی رابطہ بھی متاثر ہونے کی اطلاعات ہیں۔ کئی مقامات پر پانی جمع ہونے کے باعث آمدورفت میں مشکلات پیدا ہوگئی ہیں اور مقامی آبادی کو محفوظ مقامات پر منتقل ہونے کی ہدایات جاری کی گئی ہیں۔
حکام نے دریائے بھوٹے کوشی کے کنارے آباد لوگوں کو ممکنہ خطرے کے پیش نظر فوری طور پر محفوظ مقامات پر منتقل ہونے کی ہدایت کی ہے۔ انتظامیہ کی جانب سے متاثرہ علاقوں میں صورتحال پر مسلسل نظر رکھی جا رہی ہے جبکہ سیلاب سے ہونے والے نقصانات کا جائزہ بھی لیا جا رہا ہے۔
چیف ڈسٹرکٹ آفیسر راسووا نے چینی خبر ایجنسی سے گفتگو کرتے ہوئے بتایا کہ متاثرہ علاقوں میں موجود لوگوں سے رابطہ قائم کرنے کی کوششیں جاری ہیں۔ حکام اور متعلقہ ادارے امدادی سرگرمیوں کو آگے بڑھانے اور متاثرہ افراد تک رسائی حاصل کرنے کی کوشش کر رہے ہیں۔ سیلاب کے باعث مزید نقصانات کا خدشہ بھی ظاہر کیا گیا ہے، جبکہ مقامی انتظامیہ نے شہریوں کو احتیاطی تدابیر اختیار کرنے کی ہدایت کی ہے۔