وزیر اعلیٰ پنجاب مریم نواز کی صاحبزادی ماہ نور صفدرکے نکاح کی پروقار تقریب جاتی امرا میں جاری ہے،ماہ نور صفدر کے نکاح کی تقریب میں صرف شریف فیملی اور قریبی عزیز و اقارب کو مدعو کیا گیا ہے۔
ذرائع کا کہنا ہے کہ جاتی امرا میں ہونے والی تقریب میں وزیر اعظم شہباز شریف، سربراہ مسلم لیگ (ن) نواز شریف اور دیگر اہم سیاسی و خاندانی شخصیات نے شرکت کی، اس خوشی کے موقع پر سادگی کو ترجیح دی گئی اور تقریب کو انتہائی محدود رکھا گیا جس میں صرف شریف خاندان کے افراد، قریبی رشتہ داروں اور عزیز و اقارب کو ہی مدعو کیا گیا تھا،وزیر اعظم شہباز شریف خصوصی طور پر نکاح میں شرکت کے لیے جاتی امرا پہنچے،نائب وزیراعظم اسحاق ڈار، سینئر وزیر مریم اورنگزیب بھی تقریب میں شریک ہیں۔
خاندانی ذرائع کے مطابق ماہ نور صفدر کے جیون ساتھی اذان جبار کا تعلق ایک معروف کاروباری اور تجارتی گھرانے سے ہے، ان کے والد جبار خالد ملک کے نامور صنعت کار ہیں اور ان کا خاندان فلور ملز کی وسیع صنعت سے وابستہ ہے۔
واضح رہے کہ ماہ نور صفدر حال ہی میں لندن کی ایس او اے ایس یونیورسٹی سے اپنی اعلیٰ تعلیم اور گریجویشن مکمل کر کے وطن واپس لوٹی ہیں وزیر اعلیٰ پنجاب مریم نواز بھی حال ہی میں اپنی صاحبزادی کی گریجویشن تقریب میں شرکت کے لیے لندن کے نجی دورے پر گئی تھیں۔
لندن میں بیٹی کی گریجویشن کے موقع پر مریم نواز نے اپنی کامیابی اور خوشی کا اظہار کرتے ہوئے کہا تھا کہ اللہ کے فضل و کرم سے ان کے تینوں بچوں نے اپنی اعلیٰ تعلیم مکمل کر لی ہے، بیٹی کی گریجویشن ان کے اور ان کے خاندان کے لیے خوشی کا موقع ہے۔
مریم نواز اور ماہ نور صفدر کی لندن سے وطن واپسی کے فوراً بعد ہی خاندانی مشاورت سے اس نکاح کی تاریخ کو حتمی شکل دی گئی۔