سرگودھا میں نکاح نامہ میں ضروری تصحیح کرنے کے عوض 10 ہزار روپے رشوت لینے والے نکاح رجسٹرار کو گرفتار کر لیا گیا۔ نکاح رجسٹرار کی گرفتاری اینٹی کرپشن ڈیپارٹمنٹ نے سٹنگ آپریشن کے ذریعے عمل میں لائی۔
اینٹی کرپشن سرگودھا کے حکام کے مطابق نکاح رجسٹرار کو رشوت لیتے ہوئے رنگے ہاتھوں گرفتار کیا گیا۔ اینٹی کرپشن سرگودھا کی ایک ٹیم نے جوڈیشل مجسٹریٹ احمد وقاص کے ہمراہ جوہرآباد میں کارروائی کی، جہاں حافظ محمد عبدالرشید، نکاح رجسٹرار جوہرآباد، کو 10 ہزار روپے رشوت وصول کرتے ہوئے رنگے ہاتھوں گرفتار کر لیا گیا۔
اینٹی کرپشن ڈیپارٹمنٹ کے حکام کے مطابق معاملہ نکاح نامہ میں دولہا کی ازدواجی حیثیت کے اندراج سے متعلق تھا۔ نکاح رجسٹرار نے نکاح نامہ کی دستاویز میں ازدواجی حیثیت کے کالم میں دولہا کی حیثیت شادی شدہ کے بجائے غیر شادی شدہ تحریر کردی تھی۔
حکام کے مطابق بعد ازاں نکاح نامہ میں اس غلطی کی تصحیح کرنے کے عوض نکاح رجسٹرار نے 10 ہزار روپے رشوت طلب کی اور یہ رقم وصول کی۔
اینٹی کرپشن حکام کے مطابق رشوت کی رقم وصول کیے جانے کی کارروائی کے دوران اینٹی کرپشن خوشاب کی ٹیم نے سٹنگ آپریشن کرتے ہوئے چھاپہ مارا اور حافظ محمد عبدالرشید کو رشوت لیتے ہوئے رنگے ہاتھوں گرفتار کرلیا۔
کارروائی کے دوران اینٹی کرپشن ٹیم نے نکاح خواں سے رشوت کی مد میں لیے گئے نشان زدہ کرنسی نوٹ بھی برآمد کرلیے۔