پارٹی میں کسی قسم کی کوئی تقسیم نہیں، مریم نواز

لندن: وزیراعلیٰ پنجاب مریم نواز نے کہا ہے کہ پنجاب کی طرح دوسرے صوبوں میں بھی عوامی فلاح اور ترقی کے لیے کام ہونا چاہیے، عوام کی خدمت کے لیے محنت کرنا ہوگی، محنت کریں گے تو کام نظر آئے گا۔

لندن میں میڈیا سے گفتگو کرتے ہوئے وزیراعلیٰ پنجاب مریم نواز نے کہا کہ پنجاب میں ترقی اور عوامی فلاح کے لیے دن رات کام کر رہے ہیں۔ ان کا کہنا تھا کہ عوام کی خدمت اور صوبے کی ترقی کے لیے مسلسل محنت ضروری ہے۔مریم نواز نے مسلم لیگ (ن) میں اختلافات اور تقسیم کی خبروں کو مسترد کرتے ہوئے کہا کہ پارٹی میں کسی قسم کی کوئی تقسیم نہیں، مسلم لیگ (ن) متحد ہے اور سب مل کر کام کر رہے ہیں۔ انہوں نے کہا کہ پارٹی کو توڑنے یا تقسیم کرنے سے متعلق باتوں میں کوئی حقیقت نہیں۔وزیراعلیٰ پنجاب نے اپنی بیٹی کی گریجویشن پر خوشی کا اظہار کرتے ہوئے کہا کہ بیٹی کی گریجویشن ان کے اور ان کے خاندان کے لیے خوشی کا موقع ہے۔مریم نواز نے بتایا کہ وہ آج لندن سے پاکستان کے لیے روانہ ہو رہی ہیں۔