کینیڈا میں 800 سے زائد جنگلاتی آگ بدستور بھڑک رہی ہے، جس کے باعث پیدا ہونے والا گھنا دھواں سرحد عبور کرتے ہوئے امریکا کی متعدد ریاستوں تک پہنچ گیا ہے۔ دھویں کی وجہ سے کئی شہروں میں فضائی آلودگی خطرناک حد تک بڑھ گئی، جبکہ حکام نے شہریوں کو غیر ضروری طور پر گھروں سے باہر نہ نکلنے کی ہدایت جاری کی ہے۔
رپورٹس کے مطابق دھویں کی دبیز تہہ نے ٹورنٹو، ڈیٹرائٹ، نیویارک اور نیو انگلینڈ کے کئی علاقوں کی فضاؤں کو اپنی لپیٹ میں لے لیا ہے۔ متعدد علاقوں میں ہوا کے معیار کو "خطرناک” قرار دیتے ہوئے ایئر کوالٹی الرٹس جاری کیے گئے ہیں۔
حکام نے خبردار کیا ہے کہ دھویں میں موجود باریک ذرات سانس کی بیماریوں، دمے، دل کے امراض اور دیگر طبی مسائل کا سبب بن سکتے ہیں۔ اسی وجہ سے شہریوں کو گھروں کے اندر رہنے، کھڑکیاں بند رکھنے اور ضرورت پڑنے پر حفاظتی ماسک استعمال کرنے کا مشورہ دیا گیا ہے۔
فضائی آلودگی کے باعث کئی شہروں میں کھیلوں، تفریحی سرگرمیوں اور دیگر آؤٹ ڈور تقریبات کو منسوخ یا ملتوی کر دیا گیا ہے تاکہ عوام کو صحت کے ممکنہ خطرات سے محفوظ رکھا جا سکے۔
دوسری جانب کینیڈا کے صوبہ اونٹاریو کے شمالی علاقے میں ایک بڑے جنگلاتی آگ کے واقعے نے مقامی فرسٹ نیشنز کمیونٹیز کو انخلا پر مجبور کر دیا ہے۔ ایک مقامی سربراہ نے بتایا کہ ان کی برادری کا علاقہ "راکھ کا ڈھیر بن چکا ہے” اور لوگوں کو اپنی جانیں بچانے کے لیے گھروں سے نکلنا پڑا۔
کینیڈا کے فائر فائٹرز اور امدادی ادارے آگ پر قابو پانے کی کوششوں میں مصروف ہیں، تاہم خشک موسم، تیز ہواؤں اور بلند درجہ حرارت کے باعث کئی علاقوں میں آگ پر قابو پانا مشکل ثابت ہو رہا ہے۔ حکام نے خبردار کیا ہے کہ اگر موسمی حالات میں بہتری نہ آئی تو مزید علاقوں کو بھی خطرات لاحق ہو سکتے ہیں۔
کینیڈا میں 800 سے زائد جنگلاتی آگ بھڑک اٹھیں، دھواں امریکا تک پھیل گیا
