پاکستان نے یمن کے حوثی باغیوں کی جانب سے سعودی عرب پر کیے گئے میزائل اور ڈرون حملوں پر شدید تشویش کا اظہار کرتے ہوئے واضح کیا ہے کہ سعودی عرب کی سلامتی پاکستان کے لیے انتہائی اہم ہے۔ ایک پاکستانی عہدیدار نے خبر رساں ادارے روئٹرز سے گفتگو میں کہا کہ پاکستان کی اعلیٰ سیاسی اور فوجی قیادت نے ایران کو اعلیٰ ترین سطح پر یہ پیغام دیا ہے کہ سعودی عرب پاکستان کی ریڈ لائن ہےاور اس پر ہونے والا کوئی بھی حملہ پاکستان کے خلاف حملہ تصور کیا جائے گا۔
روئٹرز کے مطابق پاکستانی حکام نے اس سے قبل بھی رواں سال سعودی عرب پر ایران سے منسوب حملوں پر اپنی تشویش اور ناراضی کا اظہار کیا تھا۔ تاہم اس بیان پر پاکستان کی جانب سے باضابطہ سرکاری اعلامیہ جاری نہیں کیا گیا۔
ادھر یمن کے حوثی باغیوں نے دعویٰ کیا ہے کہ انہوں نے سعودی عرب کے جنوبی شہر ابہا کے ہوائی اڈے کو متعدد بیلسٹک میزائلوں اور ڈرونز سے نشانہ بنایا۔ حملے کے بعد حوثیوں کی جانب سے جاری بیان میں سعودی فضائی حدود استعمال کرنے والی تمام فضائی کمپنیوں کو خبردار کیا گیا کہ وہ ان کے انتباہ کو سنجیدگی سے لیں۔
رپورٹس کے مطابق حوثیوں کا کہنا ہے کہ یہ کارروائی یمن کی سعودی حمایت یافتہ حکومت کی جانب سے ایک روز قبل صنعا ایئرپورٹ پر کیے گئے حملے کے جواب میں کی گئی۔
دوسری جانب خلیج تعاون کونسل (جی سی سی) نے سعودی عرب پر ہونے والے بیلسٹک میزائل اور ڈرون حملوں کی سخت الفاظ میں مذمت کرتے ہوئے عالمی برادری سے حوثی ملیشیا کے خلاف مؤثر اقدامات کا مطالبہ کیا ہے۔
جی سی سی کے سیکریٹری جنرل جاسم محمد البدیوی نے اپنے بیان میں کہا کہ شہری تنصیبات کو نشانہ بنانا بین الاقوامی قوانین اور بین الاقوامی انسانی قانون کی صریح خلاف ورزی ہے۔ ان کے مطابق ایسے حملے خطے کے امن و استحکام کو نقصان پہنچانے اور معصوم شہریوں کی جانوں کو خطرے میں ڈالنے کی کوشش ہیں۔
پاکستان کا سعودی عرب پر حوثی حملوں پر اظہارِ تشویش، ریاض کو ریڈ لائن قرار دے دیا
