وزیراعظم شہباز شریف نے کہا ہے کہ پاکستان نے ایران اور امریکا کے درمیان مذاکرات میں مخلصانہ اور مثبت کردار ادا کیا جبکہ فیلڈ مارشل سید عاصم منیر نے دونوں ممالک کی قیادت کے درمیان رابطوں میں اہم کردار ادا کیا۔
چین کے دورے کے دوران عظیم عوامی ہال میں وزیراعظم شہباز شریف کے اعزاز میں ایک پُروقار استقبالیہ تقریب منعقد ہوئی جہاں چینی وزیراعظم لی چیانگ نے ان کا پرتپاک استقبال کیا۔
تقریب میں وزیراعظم کو چین کی مسلح افواج کے چاق و چوبند دستوں کی جانب سے گارڈ آف آنر بھی پیش کیا گیا۔
اپنے خطاب میں وزیراعظم شہباز شریف نے کہا کہ عظیم دوست ملک چین کا دورہ ہمیشہ خوشی کا باعث بنتا ہے کیونکہ ہر بار چین میں نئی ترقی اور جدید تعمیرات دیکھنے کو ملتی ہیں۔
انہوں نے کہا کہ پاکستان اور چین اپنی تاریخی دوستی اور سفارتی تعلقات کے 75 سال مکمل ہونے کا جشن منا رہے ہیں، جبکہ دونوں ممالک کے بانی رہنماؤں نے اس مضبوط تعلق کی بنیاد رکھی تھی جسے آج مزید آگے بڑھایا جا رہا ہے۔
وزیراعظم نے کہا کہ دنیا اس وقت ایک نازک دور سے گزر رہی ہے اور خلیجی خطے میں جاری بحران عالمی توجہ کا مرکز بنا ہوا ہے۔
شہباز شریف نے انکشاف کیا کہ فیلڈ مارشل سید عاصم منیر حال ہی میں تہران سے واپس آئے ہیں اور انہوں نے ایران اور امریکی قیادت کے درمیان رابطوں میں اہم کردار ادا کیا۔
وزیراعظم کے مطابق فریقین کے درمیان معاملات درست سمت میں آگے بڑھ رہے ہیں جبکہ پاکستان امن اور جنگ بندی کے قیام کے لیے بھرپور سفارتی کوششیں جاری رکھے ہوئے ہے۔
انہوں نے صدر شی جن پنگ اور چینی قیادت کا شکریہ ادا کرتے ہوئے کہا کہ چین نے خطے میں امن کے لیے پاکستان کی کوششوں کی مکمل حمایت کی ہے۔
دوسری جانب چینی وزیراعظم لی چیانگ نے کہا کہ پاکستان نے علاقائی استحکام اور مشترکہ مفادات کے تحفظ کے لیے مثبت کردار ادا کیا ہے۔
چینی وزیراعظم نے اس عزم کا اظہار بھی کیا کہ چین پاکستان کے ساتھ اپنی روایتی دوستی اور عملی تعاون کو مزید فروغ دینے کے لیے پُرعزم ہے۔
ذرائع کے مطابق فیلڈ مارشل عاصم منیر اور چینی وزیراعظم کے درمیان بھی غیر رسمی ملاقات ہوئی جس میں باہمی دلچسپی کے امور پر تبادلہ خیال کیا گیا۔
پاکستان نے ایران امریکا مذاکرات میں اہم کردار ادا کیا، وزیراعظم
