کسی بھی جارحیت پر پورے خطے کو امریکا اور اسرائیل کے لیے جہنم بنا دیا جائے گا،ٹرمپ کے الٹی میٹم پر ایران کا جواب

ایران نے امریکی صدر ڈونلڈ ٹرمپ کی جانب سے دی گئی 48 گھنٹے کی آخری مہلت پر سخت ردعمل دیتے ہوئے کہا ہے کہ کسی بھی جارحیت کی صورت میں پورے خطے کو امریکا اور اسرائیل کے لیے جہنم بنا دیا جائے گا۔

خاتم الانبیا سینٹرل ہیڈکوارٹرز کے کمانڈر جنرل علی عبداللہ العبادی نے اپنے ایک سخت بیان میں صدر ٹرمپ کی دھمکی کو غیر متوازن اور احمقانہ قرار دیا ہے، اس طرح کی دھمکیاں امریکی صدر کی گھبراہٹ اور بے بسی کا منہ بولتا ثبوت ہیں۔

ایرانی عسکری حکام کا کہنا ہے کہ اگر امریکا یا اسرائیل نے ایران کی سرزمین یا مفادات کے خلاف کوئی بھی کارروائی کی، تو جواب میں امریکی دہشت گرد فوج کے تمام ڈھانچے اور اسرائیلی تنصیبات کو بغیر کسی حد کے نشانہ بنایا جائے گا۔

ایران کی توانائی تنصیبات کو نشانہ بنانے کیلئے امریکا سے گرین سگنل کا انتظار ہے،اسرائیل

ہیڈکوارٹر کے ترجمان کرنل ابراہیم ذوالفقاری نے اپنے پیغام میں کہا کہ ٹرمپ کو یہ وہم ہے کہ وہ ایران کو شکست دے سکتے ہیں، لیکن حقیقت میں یہ ایک ایسی گہری دلدل ہے جس میں امریکی صدر خود بری طرح دھنس جائیں گے اگر جارحیت میں اضافہ ہوا تو اس کا دائرہ پورے خطے تک پھیل جائے گا اور دشمن کے لیے بچنے کا کوئی راستہ نہیں رہے گا۔

واضح رہے کہ اس سے قبل صدر ٹرمپ نے سوشل میڈیا پر ایک پیغام میں کہا تھا کہ یاد رکھیں ڈیل کرنے یا آبنائے ہرمز کھولنے کے لیے پہلے ہی دس دن دے چکے ہیں،اب صرف 48 گھنٹے باقی رہ گئے ہیں اور اگر اس دوران ایران نے ان کے مطالبات نہ مانے تو ان پر جہنم کے دروازے کھول دیے جائیں گے۔

اسحاق ڈار اور عباس عراقچی کے درمیان ٹیلیفونک رابطہ

امریکی صدر نے 27 مارچ کو ایران کے بجلی گھروں اور توانائی کی تنصیبات پر حملے دس دن کے لیے روکنے کا اعلان کیا تھا تاکہ ایران کو سوچنے کا موقع مل سکے، تاہم ایران کے حالیہ جواب نے واضح کر دیا ہے کہ وہ کسی بھی دباؤ میں آنے کو تیار نہیں ہے۔

دفاعی ماہرین کے مطابق ایران نے یہ ثابت کر دیا ہے کہ اس کے پاس امریکہ اور اسرائیل کو تکلیف پہنچانے کی بھرپور صلاحیت موجود ہے ایرانی قیادت کا ماننا ہے کہ وہ اپنی دفاعی طاقت کے بل بوتے پر دشمن کے کسی بھی بڑے حملے کا منہ توڑ جواب دے سکتے ہیں۔