فرانس میں تباہ کن جنگلاتی آگ: وزیراعظم شہباز شریف کی ہر ممکن تعاون کی پیشکش

وزیراعظم شہباز شریف نے فرانس میں تباہ کن جنگلاتی آگ سے ہونے والے جانی و مالی نقصانات پر گہرے دکھ اور افسوس کا اظہار کیاہے-

سماجی رابطے کی ویب سائٹ ایکس پر اپنے بیان میں وزیراعظم نے کہا کہ حکومتِ پاکستان، پاکستانی عوام اور اپنی جانب سے وہ فرانس کے صدر ایمانوئل میکرون، حکومتِ فرانس اور فرانسیسی عوام، خصوصاً ان تمام افراد سے دلی ہمدردی اور تعزیت کا اظہار کرتے ہیں جو اس سانحے کے باعث بے گھر ہوئے یا کسی بھی طرح متاثر ہوئے ہیں،پاکستان کی دعائیں ان تمام افراد کے ساتھ ہیں جو جنگلاتی آگ پر قابو پانے کی کوششوں میں مصروف ہیں۔

انہوں نے امدادی اور ریسکیو کارروائیوں میں حصہ لینے والے اہلکاروں کی خدمات کو سراہتے ہوئے متاثرہ آبادیوں کی جلد بحالی کے لیے نیک خواہشات کا اظہار کیا،اور کہا کہ پاکستان ان تمام علاقوں اور آبادیوں کے لیے دعاگو ہے جو اس قدرتی آفت کی زد میں ہیں اورامید کرتا ہے کہ صورتحال جلد از جلد قابو میں آ جائے تاکہ بحالی کی سرگرمیاں تیزی سے آگے بڑھ سکیں۔

وزیراعظم نے اپنے پیغام میں اس عزم کا بھی اعادہ کیا کہ پاکستان اس مشکل وقت میں فرانس کے ساتھ مکمل یکجہتی کا اظہار کرتا ہے اور اگر ضرورت پیش آئی تو ہرممکن تعاون فراہم کرنے کے لیے تیار ہے۔