پنجاب میں پولیس ملازمین کے آٹسٹک بچوں کے لیے تعلیمی وظیفے کی رقم میں بڑا اضافہ کردیا گیا ہے، جس کے بعد وظیفے کی رقم 30 ہزار روپے سے بڑھا کر 75 ہزار روپے مقرر کردی گئی ہے۔
آئی جی پنجاب راؤ عبدالکریم کی ہدایات پر پنجاب پولیس نے اپنے ملازمین کے آٹسٹک بچوں کے لیے تعلیمی وظائف میں نمایاں اضافہ کیا ہے۔ اس فیصلے کے تحت پہلے 30 ہزار روپے سالانہ وظیفہ حاصل کرنے والے اہل بچوں کو اب 75 ہزار روپے تعلیمی وظیفہ دیا جائے گا۔
ترجمان پنجاب پولیس کے مطابق تعلیمی وظیفے میں اضافے کا مقصد پولیس ملازمین کے بچوں کو بہتر تعلیمی سہولیات اور آگے بڑھنے کے زیادہ مواقع فراہم کرنا ہے۔ پولیس حکام کا کہنا ہے کہ ملازمین کی فلاح و بہبود کے لیے مختلف اقدامات جاری ہیں تاکہ انہیں اور ان کے اہلخانہ کو درپیش مسائل میں ممکنہ حد تک معاونت فراہم کی جاسکے۔
آئی جی پنجاب راؤ عبدالکریم نے کہا کہ پولیس ملازمین اور ان کے اہلخانہ کی فلاح و بہبود اولین ترجیح ہے۔ ایسے اقدامات کا مقصد ملازمین کے بچوں کو بہتر تعلیم، ترقی اور مستقبل کے لیے زیادہ سے زیادہ مواقع فراہم کرنا ہے۔