بجلی کی غیر اعلانیہ لوڈشیڈنگ ختم ،قیمتوں میں اضافہ واپس لیا جائے،خالدنیک گجر

مرکزی مسلم لیگ کے ڈپٹی سیکرٹری جنرل خالد نیک گجر نے کہا ہے کہ ایک طرف گرمیوں میں بجلی کی لوڈشیڈنگ عروج پر ہے تو وہیں نیپرا کی جانب سے بجلی کی قیمتوں میں اضافہ کر دیا گیا ہے، بجلی،پٹرول ،گیس سب کچھ مہنگا،حکمران اپنی عیاشیوں کے لئےغریب عوام کے منہ سے نوالہ بھی چھیننا چاہتے ہیں، مرکزی مسلم لیگ عوامی حقوق کے لئے انکے ساتھ کھڑی ہے

خالد نیگ گجرکا کہنا تھا کہ نیپرا کی جانب سے بجلی 33.64 پیسے فی یونٹ مہنگی کرنے کے فیصلہ عوام دشمن ہے، ایک ایسے وقت میں جب مہنگائی نے عوام کی کمر توڑ دی ہے، بجلی کی قیمتوں میں مسلسل اضافہ غریب، متوسط طبقے، مزدور، کسان اور چھوٹے کاروبار کرنے والوں پر مزید معاشی بوجھ ڈالنے کے مترادف ہے، حکومت اور متعلقہ ادارے عوام کو ریلیف دینے کے بجائے ہر ماہ نئے اضافی بوجھ مسلط کر رہے ہیں، جو کسی صورت قابلِ قبول نہیں ،ایک طرف شدید ترین گرمی کے ایام میں بجلی ہی نہیں آتی ،بجلی کی غیر اعلانیہ لوڈشیڈنگ ملک بھر میں ہو رہی ہے ،تو دوسری جانب بجلی مہنگی کرنے کا حکمرانی تحفہ عوام مسترد کرتے ہیں، ضرورت اس امر کی ہے کہ نیپرا کے اس فیصلے کو فوری طور پر واپس لیا جائے، بجلی کی قیمتوں میں مسلسل اضافے کا سلسلہ بند کیا جائے،غیر اعلانیہ لوڈشیڈنگ کا بھی خاتمہ کیا جائے.