عرب میڈیا نے دعویٰ کیا ہے کہ آبنائے ہرمز کو مکمل طور پر بحال کرنے کے لیے سفارتی رابطوں میں نمایاں پیش رفت ہوئی ہے اور اس حوالے سے اہم اعلان آئندہ چند گھنٹوں یا بدھ کے روز متوقع ہے۔
رپورٹس کے مطابق مختلف متعلقہ ممالک کے درمیان گزشتہ کئی دنوں سے جاری مذاکرات مثبت مرحلے میں داخل ہو چکے ہیں۔ سفارتی ذرائع کا کہنا ہے کہ خطے میں کشیدگی کم کرنے، عالمی تجارت کو معمول پر لانے اور توانائی کی ترسیل کو محفوظ بنانے کے لیے مسلسل رابطے جاری ہیں۔
عرب ٹی وی کے مطابق مذاکرات میں ہونے والی پیش رفت کے بعد اس بات کے امکانات بڑھ گئے ہیں کہ آبنائے ہرمز کو مکمل طور پر بحری آمدورفت کے لیے کھولنے کا باضابطہ اعلان جلد کیا جائے گا۔ اگر ایسا ہوتا ہے تو خلیجی خطے میں تجارتی سرگرمیوں کی بحالی، تیل بردار جہازوں کی بلا رکاوٹ نقل و حرکت اور عالمی منڈی میں توانائی کی فراہمی مزید مستحکم ہونے کی توقع ہے۔
ماہرین کے مطابق آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں سے عالمی سطح پر خام تیل اور مائع قدرتی گیس کی بڑی مقدار مختلف ممالک کو پہنچائی جاتی ہے۔ حالیہ کشیدگی اور سیکیورٹی خدشات کے باعث اس راستے پر جہازوں کی آمدورفت متاثر ہوئی تھی، جس کے اثرات عالمی تیل کی قیمتوں اور سپلائی چین پر بھی دیکھنے میں آئے۔
رپورٹس میں یہ بھی کہا گیا ہے کہ مذاکرات کا مقصد نہ صرف بحری راستے کو مکمل طور پر محفوظ بنانا ہے بلکہ خطے میں پائیدار استحکام کے لیے سفارتی کوششوں کو بھی آگے بڑھانا ہے۔ اگر معاہدہ حتمی شکل اختیار کر لیتا ہے تو اس سے عالمی تجارت اور توانائی کی منڈیوں میں اعتماد بحال ہونے میں مدد مل سکتی ہے۔
آبنائے ہرمز جلد مکمل طور پر کھولنے کا اعلان متوقع
