سعودی عرب اور پاکستان نے سائبر سیکیورٹی کے شعبے میں باہمی تعاون مزید مضبوط بنانے کے لیے مفاہمت کی یادداشت پر دستخط کر دیے۔
ریاض میں ہونے والی تقریب میں مفاہمتی یادداشت سعودی نیشنل سائبر سیکیورٹی اتھارٹی اور پاکستان کی وزارتِ انفارمیشن ٹیکنالوجی و ٹیلی کمیونیکیشن کے درمیان طے پائی۔ معاہدے پر سعودی نیشنل سائبر سیکیورٹی اتھارٹی کے گورنر انجینئر ماجد بن محمد المزيد اور پاکستان کی وزیرِ مملکت برائے انفارمیشن ٹیکنالوجی و ٹیلی کمیونیکیشن شزہ فاطمہ خواجہ نے دستخط کیے۔
مفاہمت کا مقصد دونوں ممالک کے درمیان سائبر سیکیورٹی کے شعبے میں تعاون کو فروغ دینا، سائبر اسپیس اور اہم قومی مفادات کا تحفظ یقینی بنانا جبکہ سائبر خطرات سے نمٹنے کے لیے تجربات اور بہترین طریقہ کار کا تبادلہ کرنا ہے۔
سعودی حکام کے مطابق یہ اقدام سائبر سیکیورٹی کے شعبے میں بین الاقوامی تعاون اور شراکت داری کو مزید فروغ دینے کی سعودی کوششوں کا حصہ ہے۔