لاہور: وزیراعلیٰ پنجاب مریم نواز شریف نے مری اور اس کے نواحی علاقوں میں سیاحت کے فروغ کے لیے بڑے ترقیاتی منصوبوں کی اصولی منظوری دے دی ہے، جن میں کوٹلی ستیاں میں صوبے کا پہلا اسکائی گلاس برج بنانے کا منصوبہ بھی شامل ہے۔
پاکستان مسلم لیگ ن کے صدر محمد نواز شریف اور وزیراعلیٰ مریم نواز کی زیر صدارت ایک اہم اجلاس میں مری کے تحفظ اور بحالی کے منصوبوں پر تفصیلی غور کیا گیا۔ اجلاس میں لینڈ سلائیڈنگ جیسے مسائل سے نمٹنے کے لیے عالمی ماہرین کی خدمات حاصل کرنے کا فیصلہ کیا گیا، جبکہ متاثرہ علاقوں میں فوری امدادی اقدامات کی ہدایت بھی جاری کی گئی۔
وزیراعلیٰ نے چٹا موڑ، دریا گلی، بانسرہ گلی، نمل اور جھیکا گلی سمیت مختلف علاقوں میں لینڈ سلائیڈنگ سے متاثرہ افراد کی بحالی کو ترجیح دینے کی ہدایت کی۔ اس کے ساتھ مری میں تین نئے ہاسپٹلٹی زونز قائم کرنے کی منظوری بھی دی گئی، جہاں نجی شعبے کے تعاون سے عالمی معیار کے ہوٹل تعمیر کیے جائیں گے۔
اجلاس میں مری کے انفراسٹرکچر کو بہتر بنانے کے لیے اہم سڑکوں کی توسیع کا منصوبہ بھی پیش کیا گیا، جس کے تحت جھیکا گلی روڈ اور ریچ بل روڈ کو وسیع کیا جائے گا۔ مزید برآں مری گلاس ٹرین پراجیکٹ کے تعمیراتی کام کا آغاز ایک ماہ میں کرنے کا ہدف مقرر کیا گیا ہے۔
سیاحت کے فروغ کے لیے تین نئے پارکس، ایک جدید زولوجیکل گارڈن، ایکوزون، برج کراسنگ اور جدید کانفرنس روم بنانے کا بھی فیصلہ کیا گیا۔ جنگلی حیات کے تحفظ کے لیے بیئر اور ٹائیگر ہاؤسز کے قیام کے منصوبے بھی شامل ہیں۔
چیوڑاہل کے مقام پر مری کا پہلا گلیمینگ پوڈ ویلج بھی قائم کیا جائے گا، جسے جدید سیاحتی سہولیات سے آراستہ کیا جائے گا اور اس کا انتظام نجی شعبے کے حوالے کیا جائے گا۔
مری میں اسکائی گلاس برج اور بڑے سیاحتی منصوبوں کی منظوری: مریم نواز
