شاہ رخ خان صرف بڑے اسٹار ہیں بڑے اداکار نہیں، فردوس جمال

پاکستان کے سینئر اداکار فردوس جمال نے بالی ووڈ کے سپر اسٹار شاہ رخ خان کو بڑا اداکار ماننے سے انکار کر دیا کہا کہ دلیپ کمار سے ان کا موازنہ بے معنی ہے-

اداکار فردوس جمال حال ہی میں اداکار و میزبان محسن عباس حیدر کے شو میں بطور مہمان شریک ہوئے جہاں انہوں نے مختلف فنکاروں اور ان کی فنی صلاحیتوں پر کھل کر اظہارِ خیال کیا،گفتگو کے دوران فردوس جمال نے کہا کہ وہ بالی ووڈ کے لیجنڈری اداکار دلیپ کمار کے مداح ہیں لیکن شاہ رخ خان کا دلیپ کمار سے موازنہ درست نہیں دلیپ کمار ایک منفرد اور عظیم اداکار تھے جبکہ شاہ رخ خان اس معیار کی اداکاری پیش نہیں کر سکے۔

انہوں نے کہا کہ شاہ رخ خان کی ادائیگی، تلفظ اور اندازِ گفتگو میں وہ پختگی نظر نہیں آتی جو ایک عظیم اداکار کی پہچان ہوتی ہےجبکہ ان کی جسمانی ساخت بھی معیار کے مطابق نہیں ہے انہوں نے مزید کہا کہ شاہ رخ خان ایک غیر معمولی شہرت رکھنے والے سپر اسٹار ضرور ہیں، لیکن بطور اداکار ان کا مقام اتنا بلند نہیں جتنا ان کی مقبولیت ہے۔

واضح رہے کہ فردوس جمال بالی ووڈ کے لیجنڈ اداکار دلیپ کمار کے مداح ہیں اور دلیپ کمار، شاہ رخ خان کو اداکاری میں اپنا جانشین کہا کرتے تھے اور وہ اور ان کی اہلیہ سائرہ بانو دونوں شاہ رخ خان کے بہت قریب ہیں کنگ خان کی اداکاری کا انداز دلیپ کمار سے کافی ملتا جلتا ہے-