وزیراعظم شہباز شریف دو روزہ دورے پر آج شام سعودی عرب روانہ ہوں گے۔
ذرائع کا کہنا ہے کہ دورہ سعودی عرب کے دوران وزیراعظم شہباز شریف سعودی ولی عہد شہزادہ محمد بن سلمان سے ملاقات کریں گے، وزیر اعظم شہباز شریف اور سعودی ولی عہد محمد بن سلمان کی ملاقات میں پاکستان اور سعودی عرب کے تعلقات اور خطے کی صورت حال پرگفتگو ہوگی۔
دوسری،جانب،نائب وزیراعظم و وزیر خارجہ سینیٹر محمد اسحاق ڈار سعودی عرب کے شہر مدینہ منورہ پہنچ گئے، جہاں انہوں نے مسجد نبویؐ میں حاضری دی، روضۂ رسولؐ پر سلام پیش کیا اور نوافل ادا کیے۔
دفتر خارجہ پاکستان کے مطابق اسحاق ڈار نے اپنے دورے کے دوران پاکستان کے امن، ترقی اور خوشحالی کے ساتھ ساتھ پوری امتِ مسلمہ کی سلامتی، اتحاد اور فلاح کے لیے خصوصی دعائیں کیں،اس موقع پر نائب وزیراعظم و وزیر خارجہ نے جبلِ اُحد کا بھی دورہ کیا، جہاں انہوں نے حضرت امیر حمزہؓ کے مزار پر حاضری دی، فاتحہ خوانی کی اور غزوۂ اُحد کے تمام شہدا کے لیے دعائے مغفرت کی،اسحاق ڈار کا یہ روحانی دورہ ان کے سعودی عرب کے سرکاری دورے کا حصہ ہے، جس کے دوران وہ مختلف سفارتی سرگرمیوں میں بھی شرکت کریں گے۔