راولپنڈی: پاک فوج، فرنٹیئر کور (ایف سی) اور پولیس کی جانب سے بلوچستان میں جاری مشترکہ آپریشن شعبان کے دوران مزید 3 دہشت گرد مارے گئے ہیں، جس کے بعد اس آپریشن میں ہلاک ہونے والے دہشت گردوں کی مجموعی تعداد 91 ہو گئی ہے۔
سیکیورٹی ذرائع کے مطابق فورسز فتنہ الخوارج کے خلاف مختلف علاقوں میں بھرپور کارروائیاں جاری رکھے ہوئے ہیں۔ تازہ کارروائیوں کے دوران مزید تین دہشت گرد مارے گئے، جبکہ دشوار گزار علاقوں میں قائم دہشت گردوں کے ٹھکانوں کو بھی مؤثر انداز میں نشانہ بنایا گیا۔
ذرائع کا کہنا ہے کہ پاک فوج، ایف سی اور پولیس کی مربوط حکمت عملی کے باعث دہشت گردوں کو مسلسل بھاری نقصان اٹھانا پڑ رہا ہے۔ فورسز جدید انٹیلی جنس معلومات کی بنیاد پر کارروائیاں کر رہی ہیں تاکہ دہشت گرد نیٹ ورک کا مکمل خاتمہ یقینی بنایا جا سکے۔
سیکیورٹی ذرائع کے مطابق 5 جولائی سے شروع ہونے والی مختلف کارروائیوں کے دوران اب تک مجموعی طور پر 129 دہشت گرد مارے جا چکے ہیں۔ ان آپریشنز کا مقصد بلوچستان میں امن و امان کی صورتحال کو مزید بہتر بنانا اور دہشت گرد عناصر کی نقل و حرکت کو مکمل طور پر ختم کرنا ہے۔
حکام کا کہنا ہے کہ دہشت گردوں کے خلاف کارروائیاں پوری شدت سے جاری رہیں گی اور آخری دہشت گرد کے خاتمے تک آپریشن شعبان بلا تعطل جاری رکھا جائے گا۔ فورسز نے عزم ظاہر کیا ہے کہ ملک دشمن عناصر کو دوبارہ منظم ہونے کا کوئی موقع نہیں دیا جائے گا اور عوام کے جان و مال کے تحفظ کے لیے ہر ممکن اقدام کیا جائے گا۔
سیکیورٹی اداروں نے عوام سے بھی اپیل کی ہے کہ مشکوک سرگرمیوں کی فوری اطلاع متعلقہ اداروں کو دیں تاکہ دہشت گردی کے خاتمے کی قومی کوششوں کو مزید مؤثر بنایا جا سکے۔
آپریشن شعبان میں مزید 3 دہشت گرد ہلاک، مجموعی تعداد 91 ہوگئی
