تل ابیب: اسرائیلی میڈیا میں سامنے آنے والی رپورٹس کے مطابق اسرائیلی کاروباری شخصیت رونی مانی نے دعویٰ کیا ہے کہ امریکی صدر ڈونلڈ ٹرمپ نے لبنان سے متعلق امریکی مطالبات منوانے کے لیے اسرائیلی وزیراعظم بنیامین نیتن یاہو کی اہلیہ سارہ نیتن یاہو پر دباؤ ڈالا تھا۔
رونی مانی کے مطابق ٹرمپ نے سارہ نیتن یاہو کو خبردار کیا کہ اگر لبنان کے حوالے سے امریکی مؤقف اور مطالبات کو تسلیم نہ کیا گیا تو بنیامین نیتن یاہو کو جیل کا سامنا کرنا پڑ سکتا ہے، جبکہ ان کے بیٹے یائر نیتن یاہو کو امریکا سے بے دخل اور خاندان کے امریکی اثاثے منجمد کیے جا سکتے ہیں۔انہوں نے مزید دعویٰ کیا کہ ٹرمپ نے سارہ نیتن یاہو کو یہ یقین دہانی بھی کرائی کہ اگر آئندہ انتخابات میں نیتن یاہو کو شکست کا سامنا کرنا پڑا تو ان کے خاندان کو امریکا میں پناہ دی جا سکتی ہے۔
رونی مانی کے بقول سارہ نیتن یاہو نے ٹرمپ کو یقین دلایا کہ وہ ان کے مؤقف کی حمایت کرتی ہیں اور بعد ازاں بنیامین نیتن یاہو پر شدید دباؤ ڈالا، جس کے نتیجے میں اسرائیلی وزیراعظم نے ٹرمپ سے رابطہ کر کے لبنان سے متعلق امریکی مؤقف سے اتفاق کر لیا۔تاہم ان دعوؤں کی تاحال کسی آزاد اور معتبر ذریعے سے تصدیق نہیں ہو سکی ہے۔ نہ ہی امریکی انتظامیہ اور نہ ہی اسرائیلی حکومت یا نیتن یاہو خاندان کی جانب سے ان الزامات اور دعوؤں کی باضابطہ توثیق یا تردید سامنے آئی ہے۔