امریکا نے ایران پر معاشی دباؤ مزید بڑھانے کے لیے سخت اور غیر معمولی اقدامات کی تیاری کا اعلان کر دیا ہے۔ امریکی وزیر خزانہ اسکاٹ بیسنٹ نے کہا ہے کہ واشنگٹن ایران کو ایسی معاشی تنہائی کا سامنا کرانے کی تیاری کر رہا ہے جس کی مثال پہلے نہیں ملتی۔
رائٹرز کے مطابق اسکاٹ بیسنٹ نے ایک انٹرویو میں کہا کہ امریکا ایران کے خلاف مزید سخت اقدامات کرے گا اور آئندہ ہفتے ان اقدامات سے متعلق مزید تفصیلات سامنے آنے کی توقع ہے۔ ان کے مطابق امریکی پالیسی کا مقصد ایران پر معاشی دباؤ میں نمایاں اضافہ کرنا ہے۔
امریکی وزیر خزانہ نے کہا کہ ایران کے بیرون ملک مالیاتی وسائل اور ڈیجیٹل کرنسی کے ذریعے ہونے والی سرگرمیوں کو بھی نشانہ بنایا جا رہا ہے۔ امریکا پہلے ہی ایران سے منسلک متعدد ڈیجیٹل والٹس اور کرپٹو نیٹ ورکس کے خلاف کارروائیاں کر چکا ہے، جبکہ جون میں امریکی محکمہ خزانہ نے واضح کیا تھا کہ ایران کی پابندیوں سے بچنے والی مالیاتی سرگرمیوں اور ڈیجیٹل اثاثوں کے استعمال کے خلاف کارروائی جاری رکھی جائے گی۔
حالیہ دنوں میں امریکا نے ایران سے منسلک مالیاتی نیٹ ورکس اور کرپٹو ایکسچینجز پر بھی پابندیاں عائد کی ہیں۔ امریکی حکام کا مؤقف ہے کہ ان نیٹ ورکس کو پابندیوں سے بچنے اور ایرانی اداروں کی مالی سرگرمیوں میں مدد کے لیے استعمال کیا جا رہا تھا۔
یہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی برقرار ہے اور آبنائے ہرمز کی صورتحال بھی عالمی توجہ کا مرکز بنی ہوئی ہے۔ امریکی وزیر خزانہ کے تازہ بیان سے ظاہر ہوتا ہے کہ واشنگٹن اقتصادی پابندیوں کے دائرہ کار کو مزید وسیع کرنے کی تیاری کر رہا ہے۔
ممکنہ نئی پابندیوں کے اثرات صرف ایران کی معیشت تک محدود نہیں رہ سکتے۔ اگر ایران کی تیل کی تجارت، بین الاقوامی مالیاتی لین دین اور ڈیجیٹل اثاثوں تک رسائی پر مزید پابندیاں عائد کی جاتی ہیں تو اس کے عالمی توانائی کی منڈی، خام تیل کی قیمتوں اور خطے میں تجارتی سرگرمیوں پر بھی اثرات مرتب ہونے کا امکان ہے۔
امریکا کا ایران پر مزید سخت پابندیاں عائد کرنے کا اعلان
