عرب میڈیا رپورٹس کے مطابق ایران اور امریکا کے درمیان جاری سفارتی مذاکرات کے ممکنہ فریم ورک کو “اسلام آباد ڈیکلریشن” کا نام دیے جانے کا امکان ظاہر کیا جا رہا ہے۔
رپورٹس کے مطابق ابتدائی معاہدہ ایک صفحے پر مشتمل ہوگا، جس میں دونوں ممالک کے درمیان بنیادی نکات اور آئندہ مذاکرات کے خدوخال شامل ہوں گے۔
العربیہ کی رپورٹ میں کہا گیا ہے کہ اگر ابتدائی معاہدہ طے پا جاتا ہے تو اس کے بعد ایک مقررہ مدت کے اندر جامع اور تفصیلی مذاکرات کا آغاز کیا جائے گا، جس کے لیے باقاعدہ ٹائم فریم بھی طے کیا جائے گا۔
ذرائع کے مطابق مجوزہ فریم ورک کے تحت ایران اور امریکا مختلف متنازع امور پر مرحلہ وار بات چیت کریں گے تاکہ خطے میں کشیدگی کم کی جا سکے اور سفارتی حل کی راہ ہموار ہو۔
تجزیہ کاروں کا کہنا ہے کہ اگر مذاکراتی فریم ورک کو “اسلام آباد ڈیکلریشن” کا نام دیا جاتا ہے تو یہ پاکستان کے سفارتی کردار کے لیے ایک اہم پیش رفت تصور کی جائے گی۔
رپورٹس کے مطابق پاکستان حالیہ علاقائی کشیدگی میں سفارتی رابطوں اور مذاکراتی کوششوں کے ذریعے اہم کردار ادا کر رہا ہے، جبکہ مختلف عالمی اور علاقائی قوتیں بھی کشیدگی کم کرنے کے لیے متحرک ہیں۔
واضح رہے کہ ایران اور امریکا کے درمیان حالیہ کشیدگی نے مشرقِ وسطیٰ کی صورتحال کو انتہائی حساس بنا دیا ہے، جبکہ عالمی سطح پر توانائی، تجارت اور سیکیورٹی سے متعلق خدشات بھی بڑھتے جا رہے ہیں۔
ایران امریکا مذاکراتی فریم ورک کو “اسلام آباد ڈیکلریشن” کا نام دینے کا امکان
