امریکی فوجی طیارے سیلاب متاثرین کے لیے امداد لے کر پاکستان پہنچ گئے
پاکستان میں حالیہ تباہ کن سیلاب کے بعد عالمی برادری کی جانب سے امداد کا سلسلہ جاری ہے۔ امریکی فوجی طیارے ہفتے کے روز سیلاب متاثرین کے لیے امدادی سامان لے کر پاکستان پہنچ گئے۔ امداد نور خان ایئر بیس پر اتاری گئی، جہاں امریکی ناظم الامور نیٹلی بیکر بھی موجود تھیں۔امریکی سفارتخانے کے ترجمان کے مطابق، امدادی سامان میں خیمے، صاف پانی کے فلٹرز، طبی آلات اور دیگر ضروری اشیاء شامل ہیں جنہیں سیلاب سے متاثرہ علاقوں میں پہنچایا جائے گا۔
اس موقع پر امریکی ناظم الامور نیٹلی بیکر نے پاکستان میں سیلاب سے ہونے والے جانی و مالی نقصانات پر گہرے دکھ کا اظہار کیا اور کہا کہ مشکل کی اس گھڑی میں امریکا پاکستانی عوام کے ساتھ کھڑا ہے۔ انہوں نے متاثرہ خاندانوں سے ہمدردی کرتے ہوئے کہا کہ امریکا کی جانب سے امدادی سرگرمیوں میں مزید تعاون جاری رہے گا۔
امریکہ نے آرمی سینٹرل کمانڈ (یو ایس آر سینٹ) کے ذریعے سیلاب سے متاثرہ آبادی کے لیے انسانی ہمدردی کی بنیاد پر امداد فراہم کی ہے۔ مجموعی طور پر چھ پروازیں امدادی سامان لے کر پاکستان پہنچیں گی، جن میں خیمے، پانی نکالنے کے پمپ اور جنریٹر سمیت ضروری اشیاء شامل ہیں۔