امریکا کی پاکستان میں توانائی، انفراسٹرکچر ، معدنیات اور آئی ٹی میں سرمایہ کاری میں دلچسپی

امریکا میں سفیر پاکستان رضوان سعید شیخ کی امریکی بین الاقوامی ترقیاتی مالیاتی کارپوریشن ( یو ایس انٹرنیشنل ڈویلپمنٹ فنانس کارپوریشن) کے چیف ایگزیکیٹو آفیسر بینجمن بلیک سے ملاقات ہوئی-

سفیرپاکستان نے ڈی ایف سی کی جانب سے پاکستان میں توانائی، انفراسٹرکچر ، معدنیات ، آئی ٹی اور پورٹس جیسے اہم شعبہ جات میں سرمایہ کاری میں دلچسپی کو سراہا،مختلف شعبہ جات میں جاری اور مُمکنہ منصوبوں میں پیش رفت کا جائزہ اور دونوں جانب سے نُکتہ ہائے ارتکاز کی نامزدگی پر بھی تبادلہ خیال ہوا۔

اس موقع پر سفیر پاکستان رضوان سعید شیخ کی جانب سے ڈی ایف سی کے چیف ایگزیکیٹو کو فیفا ورلڈ کپ کے لئے پاکستان میں تیار کیا جانے والا آفیشل فٹ بال “ٹرائیونڈا ” تحفتاً پیش کیا اور کہا کہ فیفا ورلڈ کپ کے لئے پاکستان میں تیار کیے جانے والے فٹ بال کا متواتر انتخاب ملک کے لئے قابلِ طمانیت وا فتخار ہے۔

چیف ایگزیکیٹو ڈی ایف سی بینجمن بلیک کی جانب سے ٹرائیونڈا کے معیار کی تعریف کی گئی،پاکستان کی سماجی و معاشی ترقی اور انفراسٹرکچر کی مزید بہتری کے حوالے سے شراکت داری جاری رکھنے کے عزم کا اعادہ کیا پاکستانی سفیرِکا کہنا تھا کہ پاک امریکہ اقتصادی شراکت داری دونوں ممالک کے درمیان دیرپا تعلقات کی ضامن ہوگی۔