نیویارک: امریکا کے شہر نیویارک میں ایک چھوٹا طیارہ (سی پلین) مشرقی دریا میں گر کر تباہ ہوگیا، تاہم بروقت امدادی کارروائیوں کے باعث طیارے میں سوار تمام 8 افراد کو بحفاظت نکال لیا گیا۔
برطانوی خبر رساں ادارے بی بی سی کے مطابق حادثہ نیویارک کے مشرقی دریا (ایسٹ ریور) میں پیش آیا، جہاں دوپہر کے وقت سی پلین کو ہنگامی لینڈنگ کے دوران حادثہ پیش آیا۔ریسکیو حکام نے بتایا کہ طیارہ پانی میں سیدھا ہی موجود رہا، جس کی وجہ سے امدادی ٹیموں کو مسافروں تک فوری رسائی حاصل ہوئی۔ اطلاع ملتے ہی ریسکیو اہلکار جائے وقوعہ پر پہنچ گئے اور تمام 8 افراد کو بحفاظت باہر نکال لیا۔حکام کے مطابق حادثے میں دو افراد معمولی زخمی ہوئے، تاہم انہوں نے موقع پر طبی امداد لینے سے انکار کر دیا، جبکہ دیگر تمام افراد محفوظ رہے۔
دوسری جانب فیڈرل ایوی ایشن ایڈمنسٹریشن (FAA) کا کہنا ہے کہ ابتدائی معلومات کے مطابق پائلٹ نے ہارڈ لینڈنگ (سخت لینڈنگ) کی، جس کے نتیجے میں طیارے کا ایک بازو ٹوٹ گیا اور وہ دریا میں جا گرا۔ایف اے اے نے بتایا کہ حادثے کی اصل وجوہات کا تعین کرنے کے لیے باقاعدہ تحقیقات شروع کر دی گئی ہیں، جبکہ متعلقہ ادارے طیارے کے تکنیکی اور آپریشنل پہلوؤں کا بھی جائزہ لے رہے ہیں۔حکام کا کہنا ہے کہ بروقت ریسکیو کارروائیوں اور طیارے کے پانی میں متوازن حالت میں رہنے کی وجہ سے ایک بڑا سانحہ ٹل گیا۔