وانا میں سکیورٹی فورسز کی انٹیلیجنس بیسڈ کارروائی،دہشتگردی کی بڑی کوشش ناکام

سکیورٹی فورسزنے انٹیلیجنس پر مبنی کارروائی سے وانا اور گردونواح کی شہری آبادی کو ایک بڑی ممکنہ تباہی سےبچا لیا گیا-

تفصیلات کے مطابق سکیورٹی فورسزنے جنوبی وزیرستان لوئر کےعلاقے وانا (غواخوا) میں بارودی مواد سے بھری گاڑی خودکش حملے سے پہلےہی تباہ کردی کامیاب کارروائی میں سکیورٹی فورسز نے بارود سے بھری گاڑی اورموٹر سائیکل تباہ کر دیے جس میں ایک خارجی جہنم واصل اور 5 زخمی ہوئے، گاڑی میں موجود دھماکا خیز مواد کسی ممکنہ بڑے دہشتگرد حملے میں استعمال کیا جانا تھا۔

ذرائع کا کہنا ہے کہ کارروائی کے دوران سکیورٹی فورسز نے انتہائی پیشہ ورانہ مہارت سے معصوم شہریوں کی جان و مال کا تحفظ یقینی بنایا سکیورٹی فورسز نے خودکش حملے کیلئے تیارگاڑی کی مسلسل تین دن نگرانی کی اور آبادی سے دور جانے پر ہی اسے نشانہ بنایا،دہشتگردی کیخلاف یہ کامیاب کارروائی اس بات کا واضح ثبوت ہے کہ سکیورٹی فورسز امن دشمن عناصر کیخلاف سیسہ پلائی دیوار ہیں۔

واضح رہے کہ جنوبی اور شمالی وزیرستان میں دہشت گردوں کے خلاف سکیورٹی فورسز کی کارروائیاں شدت سے جاری ہیں آئی ایس پی آر کے مطابق گزشتہ ماہ فورسز نے کاروائیوں کے دوران مجموعی طور پر 48 دہشت گرد ہلاک کیے اور ان کے قبضے سے اسلحہ اور گولہ بارود بھی برآمد کیا 13 جون کو شمالی وزیرستان میں سکیورٹی فورسز کی کامیاب کارروائیوں کے دوران 21 دہشت گرد ہلاک کیے گئے ہیں۔ کارروائیوں میں میران شاہ اور گرد و نواح میں دہشت گردوں کے ٹھکانوں کو نشانہ بنایا گیا تھا۔