سندھ رینجرز نے ایک اہم انٹیلی جنس بنیادوں پر کارروائی کرتے ہوئے کراچی کے علاقے شاہ لطیف ٹاؤن سے فتنۃ الخوارج کے ایک مطلوب دہشت گرد کو گرفتار کر لیا۔
ترجمان سندھ رینجرز کے مطابق گرفتار ملزم کی شناخت جاوید علی خان عرف سواتی کے نام سے ہوئی ہے، جو محکمہ انسداد دہشت گردی (سی ٹی ڈی) سوات کو متعدد سنگین مقدمات میں مطلوب تھا۔ حکام کا کہنا ہے کہ ملزم پر سوات میں دہشت گرد حملوں، لوٹ مار اور تخریبی سرگرمیوں میں ملوث ہونے کے الزامات ہیں۔ترجمان کے مطابق سوات میں کارروائیوں کے بعد ملزم کراچی منتقل ہو گیا تھا، جہاں وہ اپنے نیٹ ورک کو دوبارہ منظم کرنے میں مصروف تھا۔ رینجرز نے کامیاب کارروائی کے بعد ملزم کو گرفتار کرکے مزید تفتیش اور قانونی کارروائی کے لیے سی ٹی ڈی سوات کے حوالے کر دیا ہے۔
سندھ رینجرز کا کہنا ہے کہ جاوید علی خان عرف سواتی 2007 میں فضل اللہ گروپ میں شامل ہوا تھا۔ مزید تحقیقات میں یہ بھی سامنے آیا کہ وہ 2022 میں بیرون ملک سے واپسی کے بعد دوبارہ سرگرم ہو گیا تھا۔حکام کے مطابق گرفتار دہشت گرد 7 جون 2026 کو سوات کے علاقے شکردرہ میں ہونے والے راکٹ حملے میں بھی ملوث رہا، جس کے نتیجے میں 3 شہری جاں بحق جبکہ متعدد افراد زخمی ہوئے تھے۔ سیکیورٹی اداروں کا کہنا ہے کہ ملزم سے مزید اہم انکشافات کی توقع ہے اور تحقیقات کا دائرہ وسیع کیا جا رہا ہے۔