بنوں میں سڑک کنارے نصب بارودی مواد کے دو دھماکوں میں 7 افراد جاں بحق جبکہ 3 زخمی ہو گئے۔ واقعہ خیبر پختونخوا کے ضلع بنوں کے علاقے مرکہ بیرا میں پیش آیا، جہاں مسافر وین کو نشانہ بنایا گیا۔
پولیس کے مطابق پہلا دھماکا سڑک کنارے نصب بارودی مواد پھٹنے سے ہوا، جس کی زد میں آ کر مسافر وین میں سوار 5 افراد موقع پر جاں بحق ہو گئے۔ دھماکے کے بعد علاقے میں خوف و ہراس پھیل گیا اور امدادی ٹیمیں فوری طور پر جائے وقوعہ پر پہنچ گئیں۔ڈی پی او بنوں یاسر آفریدی نے بتایا کہ ابتدائی دھماکے کے کچھ دیر بعد ایک اور دھماکا ہوا، جس کے نتیجے میں امدادی سرگرمیوں میں مصروف 2 افراد بھی جان کی بازی ہار گئے۔ دوسرے دھماکے سے ایک گاڑی کو بھی نقصان پہنچا۔
حکام کے مطابق دھماکوں میں زخمی ہونے والے 3 افراد کو فوری طور پر قریبی اسپتال منتقل کر دیا گیا ہے، جہاں انہیں طبی امداد فراہم کی جا رہی ہے۔ جاں بحق افراد کی لاشیں بھی اسپتال منتقل کر دی گئی ہیں۔پولیس کا کہنا ہے کہ متاثرہ مسافر وین گاؤں ہاتھی خیل سے بنوں شہر کی جانب آ رہی تھی کہ راستے میں بارودی مواد کے دھماکے کا نشانہ بن گئی۔ سیکیورٹی فورسز اور قانون نافذ کرنے والے اداروں نے علاقے کو گھیرے میں لے کر شواہد اکٹھے کرنا شروع کر دیے ہیں جبکہ واقعے کی تحقیقات جاری ہیں۔