برطانیہ میں ایک کلب کرکٹر نے عالمی ریکارڈ بنانے کی کوشش میں 100 کلومیٹر سے زائد فاصلہ دوڑنے کے بعد کرکٹ گیند کرائی۔
22 سالہ سام بوڈوانو نے شمالی لندن میں واقع لارڈز کرکٹ گراؤنڈ سے اپنی دوڑ شروع کی اور ووکنگ کے قریب ویلی اینڈ کرکٹ کلب پہنچ کر گیند کرائی۔ انہوں نے مجموعی طور پر 101.38 کلومیٹر کا فاصلہ 14 گھنٹے 6 منٹ میں طے کیا۔
سام بوڈوانو نے 30 اگست کو آدھی رات سے قبل اپنی دوڑ شروع کی اور اس دوران گیند کو مسلسل اپنے ہاتھ میں تھامے رکھا۔ انہوں نے مکمل سفید کرکٹ یونیفارم پہن کر یہ سفر مکمل کیا اور مقررہ مقام پر پہنچنے کے بعد اپنے والد کو گیند کرائی، جنہوں نے اسے کور کی جانب کھیلا، تاہم کوئی رن نہیں بنا۔
گنیز ورلڈ ریکارڈ میں اس کیٹیگری کا موجودہ اعزاز اگست 2024 میں ایک فرد نے 15 میل دوڑنے کے بعد گیند کرا کر قائم کیا تھا۔ سام بوڈوانو نے اس ریکارڈ کو توڑنے کے لیے 100 کلومیٹر کا ہدف مقرر کیا تھا، تاہم انہوں نے راستہ جان بوجھ کر کچھ طویل رکھا تاکہ کسی غیر متوقع وجہ سے 100 کلومیٹر کا ہدف مکمل کرنے میں ناکامی کا خطرہ کم کیا جاسکے۔
سام بوڈوانو نے بتایا کہ وہ 7 سال کی عمر سے کرکٹ کھیل رہے ہیں اور دوڑ کے دوران گیند کو ہاتھ میں تھامے رکھنا انتہائی مشکل تجربہ تھا۔ ان کا کہنا تھا کہ یہ دوڑ بہت مشکل تھی، ان کی ٹانگیں بری طرح تھک گئی تھیں، تاہم وہ ہدف مکمل کرنے میں کامیاب ہوگئے۔
دوڑ مکمل کرنے کے بعد بھی سام بوڈوانو نے کرکٹ میچ میں شرکت کی اور پہلی گیند کرانے کے بعد مزید 20 اوورز تک میدان میں موجود رہے۔ میچ کے دوران انہوں نے 2 چھکے بھی لگائے، تاہم ان کی ٹیم کو ایک رن سے شکست کا سامنا کرنا پڑا۔
اس منفرد کوشش کا مقصد صرف عالمی ریکارڈ قائم کرنا نہیں تھا بلکہ ایک فلاحی ادارے کے لیے 6 ہزار پاؤنڈ سے زائد رقم جمع کرنا بھی تھا۔
گنیز ورلڈ ریکارڈز کے مطابق سام بوڈوانو کی اس کوشش کی تصدیق کا عمل شروع کیا جا رہا ہے، جس کے مکمل ہونے کے بعد ہی نئے عالمی ریکارڈ کی باضابطہ تصدیق کی جائے گی۔