بھارت کی ریاست بہار کے ضلع بیگو سرائے میں پنچایت نے جنسی زیادتی کا شکار ہونے والی خاتون کو قصور وار قرار دے کر سرِعام تذلیل کا نشانہ بنایا۔
بھارت کی ریاست بہار کے ضلع بیگوسرائے کی ایک وائرل ویڈیو میں دکھایا گیا ہے کہ جنسی زیادتی کا الزام لگانے والی ایک خاتون کو گاؤں کی پنچایت نے سرِعام ذلیل و رسوا کیا اس غیر قانونی پنچایت نے خاتون کو اُس وقت اٹھک بیٹھک کرنے اور زمین سے تھوک چاٹنے پر مجبور کیا جب اُس نے اپنے پڑوسی پر زیادتی کا الزام عائد کیا تھا۔
بھارتی میڈیا کی رپورٹ کے مطابق 30 سالہ خاتون جو کہ 3 بچوں کی ماں بھی ہے، اسے 2 اور 4 جون کے درمیان پڑوسی نے مبینہ طور پر 2 بار جنسی زیادتی کا نشانہ بنایاجب یہ معاملہ پنچایت تک پہنچا تو انصاف فراہم کرنے کے بجائے الٹا اسے ہی قصوروار قرار دے کر تھوک چاٹنے پر مجبور کیا گیا۔
رپورٹ کے مطابق اس واقعے کی ویڈیو سوشل میڈیا پر وائرل ہونے کے بعد پولیس نے مقدمہ درج کر لیا ہےمقدمے میں خاتون نے یہ مؤقف اختیار کیا ہے کہ جنسی زیادتی اور پھر پنچایت میں تذلیل اس کے شوہر کی غیر موجودگی میں ہوئی جو کہ گاؤں سے دور مزدوری کرتا ہے۔
رپورٹ کے مطابق معاملے کی سنگینی کا نوٹس لیتے ہوئے ڈپٹی سپرنٹنڈنٹ آف پولیس سبودھ کمار اور متعلقہ تھانے کے ایس ایچ او نے جائے وقوع کا دورہ کیا اور تحقیقات کا آغاز کر دیا جبکہ فرار ہونے والے ملزم کی تلاش جاری ہے۔