کے ٹو ایئرویز کے کارگو طیارے کے حادثے کی تحقیقات کے لیے بیورو آف ایئر کرافٹ سیفٹی انویسٹی گیشن کی 11 رکنی خصوصی ٹیم کراچی پہنچ گئی ہے۔ تحقیقاتی ٹیم حادثے کے تمام پہلوؤں کا جائزہ لے گی اور شواہد کی بنیاد پر طیارہ حادثے کی اصل وجوہات معلوم کرنے کی کوشش کرے گی۔
ذرائع کے مطابق تحقیقاتی ٹیم اسلام آباد سے نجی ایئر لائن کی پرواز کے ذریعے کراچی پہنچی، جہاں سے ارکان فوری طور پر حادثے کے مقام کے لیے روانہ ہوئے۔ ٹیم جائے وقوعہ سے دستیاب شواہد، طیارے کے ملبے اور دیگر اہم مواد کا تفصیلی معائنہ کرے گی تاکہ حادثے سے متعلق تمام حقائق سامنے لائے جا سکیں۔
ذرائع کا کہنا ہے کہ پاکستان ایئرپورٹس اتھارٹی نے تحقیقات کے پیش نظر کے ٹو ایئرویز کا مرکزی دفتر سیل کر دیا ہے۔ تحقیقاتی ٹیم ایئرلائن کے ہیڈ آفس کا بھی دورہ کرے گی، جہاں آپریشنل اور تکنیکی ریکارڈ کا باریک بینی سے جائزہ لیا جائے گا۔
تحقیقات کے دوران طیارے کی مینٹیننس لاگ بکس، انجینئرنگ ریکارڈ، پرواز سے متعلق دستاویزات، عملے کی پیشہ ورانہ معلومات، تربیتی ریکارڈ اور دیگر متعلقہ دستاویزات کی جانچ پڑتال کی جائے گی۔ اس کے ساتھ یہ بھی دیکھا جائے گا کہ پرواز سے قبل اور دوران پرواز قومی اور بین الاقوامی فضائی حفاظتی ضوابط پر مکمل عمل کیا گیا تھا یا نہیں۔
تحقیقاتی حکام فلائٹ پلان، ایئر ٹریفک کنٹرول کے ساتھ ہونے والی گفتگو، ریڈار ڈیٹا، نیویگیشن سسٹم کی کارکردگی اور دیگر تکنیکی معلومات کا بھی تجزیہ کریں گے تاکہ حادثے کے اسباب کا درست تعین کیا جا سکے۔ اگر ضرورت پڑی تو متعلقہ عملے اور عینی شواہد رکھنے والے افراد کے بیانات بھی قلم بند کیے جائیں گے۔
ذرائع کے مطابق تحقیقاتی ٹیم کو جدید تکنیکی سہولیات اور مکمل اختیارات فراہم کیے گئے ہیں تاکہ تحقیقات شفاف، غیر جانبدار اور پیشہ ورانہ انداز میں مکمل کی جا سکیں۔ ٹیم اپنی ابتدائی رپورٹ مرتب کرنے کے بعد وزارتِ دفاع کے متعلقہ حکام کو پیش کرے گی، جس کی روشنی میں آئندہ قانونی اور انتظامی اقدامات کیے جائیں گے۔
کے ٹو ایئرویز طیارہ حادثہ، 11 رکنی تحقیقاتی ٹیم کراچی پہنچ گئی
