چیئرمین پی سی بی محسن نقوی نے پی ایس ایل کی دونوں نئی ٹیموں کےمالکان کو مبارکباد پیش کرتے ہوئے کہا ہے کہ پی ایس ایل میں 2نئی ٹیموں کی شمولیت ایک تاریخی لمحہ ہے۔
نیلامی کی تقریب کے بعد گفتگو کرتے ہوئے انہوں نے کہا کہ حیدر آباد اور سیالکوٹ کے عوام کو دلی مبارکباد پیش کرتا ہوں،ہم چاہتے ہیں کہ پی ایس ایل اور قومی کرکٹ کو مزید بہتر کریں پی ایس ایل پر اعتماد کی وجہ سےٹیموں کیلئے اتنی بڑی بولی لگی ہے،پی سی بی دونوں نئی ٹیموں کےمالکان کو بھرپورسپورٹ کرے گی، ہم سب مل کرکرکٹ اور ملک کو بلندیوں تک لے کرجائیں گے،نئےمالکان کااعتماد پی ایس ایل کی ترقی میں اہم ہوگا۔
وزیراعظم شہبازشریف نے پی ایس ایل کیلئے 2 نئی ٹیموں کے آکشن کے مرحلے کی کامیابی پر پی سی بی کو مبارکباد پیش کی ہے ۔
وزیراعظم نے چیئرمین پی سی بی اور پی ایس ایل کے انعقاد میں شریک ٹیم کی کوششوں کی پذیرائی کرتے ہوئے کہا کہ اللہ کے فضل سے ملک میں کھیلوں کی رونقیں دوبارہ سے بحال ہوئیں وقت کے ساتھ ساتھ پی ایس ایل خطے کی بڑی لیگز میں سر فہرست بن گئی،پی ایس ایل میں2 نئی ٹیموں کی آکشن کرکٹ کے فروغ کیلئے اہم سنگ میل ہے،2نئی ٹیموں کی شمولیت نے پاکستان سپر لیگ میں ایک نئی روح پھونک دی ہے،نئی ٹیموں میں بیرونی سرمایہ کاری عالمی سطح پر مقبولیت و کامیابی کا منہ بولتا ثبوت ہے۔