اسلام آباد، خیبرپختونخوا، گلگت بلتستان میں زلزلہ،ہنزہ میں مکانات اور سڑکیں متاثر

اسلام آباد، خیبرپختونخوا، گلگت بلتستان اور آزاد کشمیر کے مختلف علاقوں میں زلزلے کے شدید جھٹکے محسوس کیے گئے، جس کے باعث شہریوں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔

زلزلہ پیما مرکز کے مطابق زلزلے کی شدت 5.8 ریکارڈ کی گئی جبکہ اس کی گہرائی 10 کلو میٹر تھی۔ زلزلے کا مرکز کشمیر کا شمال مغربی حصہ بتایا گیا ہے۔ جھٹکے اسلام آباد، راولپنڈی، پشاور، سوات، ہنزہ، گلگت اور گرد و نواح میں واضح طور پر محسوس کیے گئے، جبکہ بعض علاقوں میں ہلکے جھٹکے بھی رپورٹ ہوئے۔

زلزلے کے باعث ضلع ہنزہ کے مختلف علاقوں میں نقصان کی اطلاعات موصول ہوئی ہیں۔ذرائع کے مطابق ہنزہ کے گاؤں چپورسن میں زلزلے کے نتیجے میں مکانات اور سڑکیں متاثر ہوئیں۔ اسی طرح ریشت گاؤں میں زلزلے کے باعث لینڈ سلائیڈنگ ہوئی جس سے رابطہ سڑک کو نقصان پہنچا اور آمد و رفت میں مشکلات پیش آئیں۔ہنزہ کے علاقوں شٹمرگ اور زودخون میں بھی زلزلے کے جھٹکوں سے کئی مکانات متاثر ہونے کی اطلاعات ہیں، تاہم تاحال کسی جانی نقصان کی تصدیق نہیں ہو سکی۔زلزلے اور لینڈ سلائیڈنگ کے باعث گینش سمیت متعدد مقامات پر شاہراہ قراقرم بلاک ہونے کی اطلاعات بھی سامنے آئی ہیں، جس سے مسافروں کو شدید مشکلات کا سامنا ہے۔ متعلقہ ادارے شاہراہ کو کھولنے اور متاثرہ علاقوں میں امدادی کارروائیاں شروع کرنے کے لیے متحرک ہیں۔ضلعی انتظامیہ اور ریسکیو ادارے صورتحال کا جائزہ لے رہے ہیں جبکہ عوام کو ہدایت کی گئی ہے کہ وہ افواہوں پر کان نہ دھریں اور احتیاطی تدابیر اختیار کریں