ایرانی میڈیا کے مطابق اسرائیل اور امریکا کی جانب سے کیے گئے حملوں میں ایران کی دو گیس تنصیبات اور ایک پائپ لائن کو نشانہ بنایا گیا ہے، جس سے توانائی کے شعبے میں خدشات بڑھ گئے ہیں۔
رپورٹس کے مطابق اصفہان میں گیس ایڈمنسٹریشن بلڈنگ اور گیس پریشر ریگولیشن اسٹیشن کو نشانہ بنایا گیا، جس کے نتیجے میں ان تنصیبات کو جزوی نقصان پہنچا۔
مزید بتایا گیا کہ جنوب مغربی ایران میں خرمشہر پاور پلانٹ سے منسلک گیس پائپ لائن کو بھی نشانہ بنایا گیا، جہاں ایک گولہ پروسیسنگ اسٹیشن کے قریب گرا، تاہم نقصان کی مکمل تفصیلات ابھی سامنے نہیں آئیں۔
یہ حملے ایسے وقت میں رپورٹ ہوئے جب امریکی صدر ڈونلڈ ٹرمپ نے ایران کے بجلی کے نظام پر حملے کی دھمکی میں نرمی کا عندیہ دیا تھا اور مذاکرات کی بات بھی کی تھی۔
ماہرین کے مطابق توانائی تنصیبات کو نشانہ بنانا خطے میں کشیدگی کو مزید بڑھا سکتا ہے اور اس کے عالمی توانائی مارکیٹ پر بھی اثرات مرتب ہو سکتے ہیں۔
ایران میں گیس تنصیبات اور پائپ لائن نشانہ، حملوں کی اطلاعات
