اٹلی کی وزیراعظم جارجیا میلونی کی توہین آمیز الفاظ میں تضحیک پر روس اور اٹلی کے درمیان سفارتی کشیدگی پیدا ہوگئی ہے، جس کے بعد روس نے اٹلی کے سفیر کو طلب کر لیا۔
غیر ملکی میڈیا رپورٹس کے مطابق روسی پریزنٹر ولادیمیر سولووف نے اپنے پروگرام کے دوران اطالوی وزیرِ اعظم کے خلاف انتہائی نازیبا اور جارحانہ زبان استعمال کی۔ انہوں نے میلونی کو “پوری نسلِ انسانی کے لیے رسوائی” قرار دیتے ہوئے مزید توہین آمیز الفاظ بھی کہے، جس پر اٹلی میں شدید ردعمل سامنے آیا،روسی ٹی وی پریزنٹر نے کہا ہے کہ میلونی ایک جنگلی جانور، بدتمیز، گھٹیا عورت ہیں، انہوں نے اپنے منتخب کرنے والوں سے بھی دھوکا کیا حتیٰ کہ انہوں نے امریکی صدر کے ساتھ بھی دھوکا کیا ہے۔
اس معاملے پر اٹلی کے وزیرِ خارجہ نے سوشل میڈیا پلیٹ فارم ایکس پر بیان جاری کرتے ہوئے کہا کہ روسی سفیر کو وزارتِ خارجہ طلب کرکے باضابطہ احتجاج ریکارڈ کرایا گیا ہے۔ انہوں نے اس واقعے کو ناقابلِ قبول قرار دیتے ہوئے کہا کہ ایک سرکاری میڈیا شخصیت کی جانب سے اس نوعیت کے بیانات سفارتی آداب کے منافی ہیں۔اطالوی میڈیا کے مطابق ملک کی اپوزیشن جماعتوں نے بھی وزیرِ اعظم کے خلاف اس توہین آمیز رویے کی شدید مذمت کی ہے اور حکومت کے ساتھ یکجہتی کا اظہار کیا ہے۔