نئی دہلی:سوئس انٹرنیشنل ایئر لائنز کی پرواز میں نئی دہلی کے ہوائی اڈے پر ٹیک آف کے دوران انجن میں آگ لگنے کے باعث ہنگامی صورتحال پیدا ہوگئی، جس کے نتیجے میں 6 مسافر زخمی ہوگئے۔
حکام کے مطابق پرواز نمبر ایل ایکس 147 زیورخ روانہ ہونے والی تھی، طیارہ رات ایک بج کر 8 منٹ پر رن وے پر ٹیک آف کی دوڑ میں تھا کہ اچانک ایک انجن میں خرابی پیدا ہوئی اور اس میں آگ بھڑک اٹھی،پائلٹس نے فوری طور پر طیارہ روک دیا، جس کے بعد تمام مسافروں کو ایمرجنسی سلائیڈز کے ذر یعے رن وے پر محفوظ طریقے سے باہر نکال لیا گیا، انخلا کے دوران 6 مسافر زخمی ہوئے جنہیں فوری طبی امداد کے لیے اسپتال منتقل کر دیا گیا، جبکہ عملے کے تمام ارکان محفوظ رہے۔
ایئر لائن کے جاری بیان کے مطابق طیارے میں 228 مسافر اور 4 شیر خوار بچے سوار تھے چند افراد جو ایمرجنسی سلائیڈ استعمال نہ کرسکے، انہیں سیڑھیوں کے ذریعے باہر نکالا گیا سوئس انٹرنیشنل ایئر لائنز نے واقعے کی مکمل تحقیقات کے لیے خصوصی ٹیم قائم کر دی ہے، جبکہ مسافروں کے لیے متبادل پروازو ں او ر ہوٹل میں قیام کے انتظامات کیے جا رہے ہیں،مسافروں اور عملے کی حفاظت اولین ترجیح ہے۔