سرگودھا میں سابق انٹرنیشنل کرکٹر نوید لطیف کے بیٹے کو 5 افراد نے تشدد کا نشانہ بنایا ہے، واقعے کا مقدمہ درج کرلیا گیا۔
پولیس کے مطابق ملزمان نوید لطیف کے بیٹے کو زخمی حالت میں چھوڑ کر فرار ہوگئے،نوید لطیف نے پولیس کو بیان دیا کہ 2 ملزمان موسیٰ خان اور رانا مسکن ان کے بیٹے کو تنگ کرتے تھے،پولیس کا کہنا ہے کہ واقعے کی تفتیش شروع کردی گئی ہے جبکہ ملزمان کو بھی جلد گرفتار کرلیا جائے گا،پولیس کے مطابق واقعہ 26 اپریل 2026 کی شام تقریباً 5:30 بجے چک نمبر 49 شمالی کے قریب پیش آیا، جہاں متاثرہ نوجوان محمد روبان سودا سلف لینے کے لیے گھر سے نکلا تھا۔ اسی دوران راستے میں موجود ملزمان نے اس کا راستہ روک لیا اور مبینہ طور پر تشدد کا نشانہ بنایا۔
ابتدائی اطلاعی رپورٹ (ایف آئی آر) کے مطابق مرکزی ملزم موسیٰ خان، جو پہلے متاثرہ خاندان کے ہمسایہ رہ چکا ہے، نے نوجوان کو مکے مارے جس سے اس کا جبڑا متاثر ہوا۔ جبکہ دوسرے ملزم نے لوہے کی کسی چیز سے وار کر کے اس کے چہرے کو زخمی کر دیا۔ رپورٹ میں بتایا گیا ہے کہ ملزمان نے نوجوان کو زمین پر گرانے کے بعد بھی تشدد جاری رکھا۔واقعے کے دوران راہگیروں آفتاب احمد اور بلال نے زخمی نوجوان کو دیکھا اور مداخلت کر کے اسے ملزمان سے چھڑوایا۔متاثرہ کے والد نوید لطیف کے مطابق ملزم موسیٰ خان سے پرانی رنجش چلی آ رہی تھی، اور اس سے قبل بھی اس نوعیت کے واقعات پیش آ چکے ہیں، جن کی شکایت ملزم کے والد کو کی گئی تھی۔زخمی نوجوان کو فوری طور پر فیصل مسعود ٹیچنگ ہسپتال منتقل کیا گیا، جہاں اس کا میڈیکل کیا گیا جبکہ رپورٹ کا انتظار ہے۔پولیس نے مقدمہ نمبر 1328/26 درج کرتے ہوئے ملزمان کے خلاف تعزیراتِ پاکستان کی دفعات 147، 149 اور 341 کے تحت کارروائی شروع کر دی ہے۔ تفتیشی حکام کا کہنا ہے کہ واقعے کی تمام پہلوؤں سے تحقیقات کی جا رہی ہیں اور ملزمان کو جلد گرفتار کر لیا جائے گا۔