ملک میں 20 کلو آٹے کا تھیلا 2700 روپے تک پہنچ گیا

‎ملک بھر میں آٹے کی قیمتوں میں مسلسل اضافے کا سلسلہ جاری ہے اور 20 کلو آٹے کے تھیلے کی قیمت بعض شہروں میں 2700 روپے تک پہنچ گئی ہے، جس کے باعث شہری شدید پریشانی کا شکار ہیں۔
‎دستاویزات کے مطابق کراچی، بنوں اور پشاور میں 20 کلو آٹے کا تھیلا سب سے مہنگا فروخت ہو رہا ہے، جہاں شہریوں کو ایک تھیلے کے لیے 2700 روپے ادا کرنا پڑ رہے ہیں۔
‎اعداد و شمار کے مطابق اسلام آباد میں 20 کلو آٹے کا تھیلا 2693 روپے 33 پیسے جبکہ راولپنڈی میں 2666 روپے 67 پیسے میں دستیاب ہے۔
‎ادارہ شماریات کی رپورٹ میں بتایا گیا کہ گوجرانوالہ میں 20 کلو آٹے کے تھیلے کی قیمت 2260 روپے، سیالکوٹ میں 2200 روپے، لاہور میں 2250 روپے اور فیصل آباد میں 2350 روپے تک پہنچ چکی ہے۔
‎اسی طرح سرگودھا میں 20 کلو آٹے کا تھیلا 2200 روپے، ملتان اور بہاولپور میں 2266 روپے 66 پیسے میں فروخت ہو رہا ہے، جبکہ حیدرآباد میں اس کی قیمت 2600 روپے تک جا پہنچی ہے۔
‎رپورٹ کے مطابق سکھر میں 20 کلو آٹے کا تھیلا 2300 روپے، کوئٹہ میں 2670 روپے اور خضدار میں 2400 روپے میں فروخت کیا جا رہا ہے۔
‎شہریوں کا کہنا ہے کہ آٹے سمیت روزمرہ اشیائے ضروریہ کی قیمتوں میں مسلسل اضافے نے گھریلو بجٹ شدید متاثر کر دیا ہے، جبکہ کم آمدنی والے طبقے کے لیے بنیادی ضروریات پوری کرنا بھی مشکل ہوتا جا رہا ہے۔
‎معاشی ماہرین کے مطابق گندم کی قیمتوں، ٹرانسپورٹ اخراجات اور مہنگائی میں اضافے کے باعث آٹے کی قیمتوں میں مسلسل اضافہ دیکھنے میں آ رہا ہے۔