ایبولا وائرس کے ممکنہ خطرے کے پیش نظر سندھ محکمہ صحت نے کراچی کے جناح انٹرنیشنل ایئرپورٹ پر نگرانی اور ہنگامی ردعمل کے اقدامات سخت کر دیے ہیں۔
محکمہ صحت سندھ کے مطابق ایبولا وائرس سے بچاؤ اور ممکنہ صورتحال سے نمٹنے کے لیے عملے کے لیے خصوصی تربیتی سیشن اور موک ایکسرسائز کا انعقاد کیا گیا ہے تاکہ ایمرجنسی صورتحال میں فوری اور مؤثر کارروائی یقینی بنائی جا سکے۔
ڈاکٹر وقار میمن نے اس موقع پر ہیلتھ اسٹاف کی مکمل تربیت اور آگاہی کو انتہائی اہم قرار دیتے ہوئے کہا کہ وائرس سے نمٹنے کے لیے پیشگی تیاری ناگزیر ہے۔
ڈاکٹر سید ظفر مہدی نے ایئرپورٹ پر آنے والے مسافروں کی مسلسل نگرانی اور فوری ردعمل کے نظام کو ضروری قرار دیا۔
محکمہ صحت سندھ کے تحت جناح انٹرنیشنل ایئرپورٹ پر ایبولا وائرس سے بچاؤ کے خصوصی انتظامات کیے جا رہے ہیں جبکہ صوبے بھر میں بھی احتیاطی تیاریوں کا آغاز کر دیا گیا ہے۔
اس حوالے سے اسپیشل سیکریٹری صحت فواد غفار سومرو کی زیر صدارت ایک اہم اجلاس بھی منعقد ہوا جس میں جناح ایئرپورٹ پر نگرانی، فوری ردعمل اور مسافروں کے لیے آئسولیشن سسٹم فعال کرنے کی ہدایات جاری کی گئیں۔
محکمہ صحت کے مطابق ایبولا وائرس کو عالمی سطح پر پبلک ہیلتھ ایمرجنسی قرار دیا جا چکا ہے، اسی لیے جناح انٹرنیشنل ایئرپورٹ پر 24 گھنٹے ایمرجنسی سروسز کی دستیابی یقینی بنانے کا فیصلہ کیا گیا ہے۔
اجلاس میں یہ بھی طے کیا گیا کہ ایئرپورٹ پر پی پی ای کٹس اور ہنگامی طبی سامان کے ذخیرے کے لیے علیحدہ اسٹور روم قائم کیا جائے گا۔
اس کے علاوہ ایف آئی اے اور پاکستان سول ایوی ایشن اتھارٹی کے عملے کے لیے بھی خصوصی حفاظتی اقدامات کی ہدایات جاری کی گئی ہیں تاکہ ایئرپورٹ پر تعینات اہلکار ممکنہ خطرات سے محفوظ رہ سکیں۔
ماہرین صحت کا کہنا ہے کہ اگرچہ پاکستان میں ایبولا وائرس کا کوئی تصدیق شدہ کیس سامنے نہیں آیا، تاہم عالمی صورتحال کے پیش نظر احتیاطی اقدامات انتہائی ضروری ہیں۔
ایبولا وائرس کے خدشے پر کراچی ایئرپورٹ پر ہائی الرٹ
