کراچی: شہر کے علاقے رسالہ میں پولیس نے انٹیلی جنس بیسڈ ٹارگٹڈ کارروائی کرتے ہوئے گھر سے 20 تولہ سونا چوری کرنے والی گھریلو ملازمہ کو گرفتار کر لیا۔ پولیس کے مطابق ملزمہ نے چوری شدہ سونے کا بڑا حصہ فروخت کر کے حاصل ہونے والی رقم سے کراچی میں ایک گھر بھی خرید لیا تھا۔
پولیس حکام کے مطابق گرفتار ملزمہ کی شناخت آصفہ کے نام سے ہوئی ہے، جو گزشتہ چھ ماہ سے متاثرہ خاندان کے گھر میں بطور ملازمہ کام کر رہی تھی۔ تفتیش کے مطابق ملزمہ نے 12 جون کو موقع پا کر گھر سے تقریباً 20 تولہ سونا چوری کیا، جس کے بعد متاثرہ خاندان کی شکایت پر تھانہ رسالہ میں مقدمہ درج کیا گیا اور تحقیقات کا آغاز کیا گیا۔
پولیس نے جدید تفتیشی طریقوں اور خفیہ معلومات کی مدد سے ملزمہ کو گرفتار کیا۔ دوران تفتیش اس کے قبضے سے چھ تولہ مسروقہ سونا برآمد کر لیا گیا، جبکہ باقی سونے کے بارے میں بھی اہم معلومات حاصل ہوئی ہیں۔
پولیس کے مطابق ملزمہ نے اعتراف کیا کہ اس نے چوری شدہ سونے کا ایک بڑا سیٹ بلوچستان کے علاقے حب میں واقع ایک جیولر کو 21 لاکھ 50 ہزار روپے میں فروخت کیا۔ اس کے بعد تقریباً دو لاکھ روپے مالیت کا مزید سونا بھی حب کے ایک اور جیولر کے ہاتھ فروخت کیا گیا۔
تحقیقات میں یہ بھی سامنے آیا کہ ملزمہ نے چوری سے حاصل ہونے والی رقم سے کراچی کے علاقے مواچھ گوٹھ میں اپنے نام پر ایک مکان خرید لیا۔ اس کے علاوہ اس نے کچھ سونا ایک اور جیولر کے پاس امانت کے طور پر بھی رکھوایا، جس کی نشاندہی کے بعد پولیس نے مزید کارروائی شروع کر دی ہے۔
رسالہ پولیس کا کہنا ہے کہ ملزمہ کے خلاف قانونی کارروائی جاری ہے جبکہ حب میں موجود ان جیولرز اور دیگر متعلقہ افراد تک پہنچنے کے لیے چھاپے مارے جا رہے ہیں تاکہ چوری شدہ تمام سونا برآمد کیا جا سکے۔ پولیس کے مطابق تحقیقات کا دائرہ مزید وسیع کیا جا رہا ہے اور اس بات کا بھی جائزہ لیا جا رہا ہے کہ آیا اس واردات میں کوئی اور شخص بھی ملوث تھا یا نہیں۔
کراچی میں 20 تولہ سونا چوری کرنے والی ملازمہ گرفتار
