وزیر اطلاعات پنجاب عظمیٰ بخاری نے آزاد کشمیر کے انتخابات کے بعد پاکستان پیپلز پارٹی کی قیادت پر سخت تنقید کرتے ہوئے کہا ہے کہ عوام نے ترقی، کارکردگی اور جدت کو ووٹ دیا، اس لیے انتخابی نتائج کو کھلے دل سے تسلیم کیا جانا چاہیے۔
لاہور میں پریس کانفرنس کرتے ہوئے عظمیٰ بخاری نے کہا کہ وزیراعلیٰ پنجاب مریم نواز کی گزشتہ 18 ماہ کی کارکردگی عوام کے سامنے ہے، جبکہ پیپلز پارٹی سندھ میں اپنی طویل حکمرانی کے باوجود عوام کو بنیادی سہولیات فراہم کرنے میں ناکام رہی ہے۔ ان کا کہنا تھا کہ اگر پیپلز پارٹی اپنی کارکردگی پیش کر سکتی ہے تو ضرور کرے، لیکن صرف الزامات سے حقیقت تبدیل نہیں ہو سکتی۔
انہوں نے کہا کہ آزاد کشمیر کے میرپور ڈویژن کے عوام نے اپنا فیصلہ ووٹ کے ذریعے دیا اور مسلم لیگ (ن) پر اعتماد کا اظہار کیا۔ ان کے مطابق جمہوری روایات کا تقاضا ہے کہ تمام سیاسی جماعتیں عوام کے فیصلے کو احترام کے ساتھ قبول کریں۔
عظمیٰ بخاری نے بلاول بھٹو زرداری کی حالیہ تقاریر پر تنقید کرتے ہوئے کہا کہ وہ سیاسی بیانیہ بنانے کی کوشش کر رہے ہیں، لیکن عوام کارکردگی کی بنیاد پر فیصلے کرتے ہیں۔ انہوں نے طنزیہ انداز میں کہا کہ "کل بلاول کسی کا گلا پکڑ رہے تھے، پھر ساری رات پیر پکڑ کر بیٹھے رہے۔”
وزیر اطلاعات پنجاب نے دعویٰ کیا کہ پنجاب میں گرین بس سروس، ایئر ایمبولینس، لیپ ٹاپ اسکیم، اسکالرشپس، جنوبی پنجاب کے ترقیاتی منصوبے اور خوبصورتی کے پروگرام جیسے متعدد منصوبے کامیابی سے جاری ہیں، جبکہ سندھ کے عوام آج بھی ٹرانسپورٹ، صفائی، تعلیم اور دیگر بنیادی سہولیات کے مسائل کا سامنا کر رہے ہیں۔
انہوں نے کہا کہ پنجاب حکومت نے بارشوں اور اربن فلڈنگ سے نمٹنے کے لیے جدید مشینری اور بہتر انتظامات کیے ہیں، جبکہ مختلف اضلاع میں ترقیاتی منصوبوں پر تیزی سے کام جاری ہے۔ ان کا کہنا تھا کہ مسلم لیگ (ن) عوامی خدمت پر یقین رکھتی ہے اور اسی بنیاد پر عوام کا اعتماد حاصل کر رہی ہے۔
عظمیٰ بخاری نے مزید کہا کہ سیاسی اختلاف جمہوریت کا حصہ ہے، تاہم بے بنیاد الزامات لگانے کے بجائے تمام جماعتوں کو اپنی کارکردگی کی بنیاد پر عوام کے سامنے جانا چاہیے۔ ان کے مطابق عوام کا فیصلہ ہی جمہوریت کی اصل طاقت ہے اور ہر سیاسی قوت کو اس کا احترام کرنا چاہیے۔
کل بلاول کسی کا گلا پکڑ رہے تھے، پھر ساری رات پیر پکڑ کر بیٹھے رہے، عظمیٰ بخاری
