پٹرول لیوی پر احتجاج:جماعت اسلامی کے پاس اسلام آباد آنے کا آپشن بھی موجود ہے ،حافظ نعیم الرحمان

امیر جماعت اسلامی حافظ نعیم الرحمان نے کہا ہے کہ آئی ایم ایف ہر پلان میں زرعی ٹیکس لگانے کا مطالبہ کرتا ہے ، زرعی ٹیکس ان پر لگنا چاہئے جس کے پاس سو ایکڑ سے زائد زمین ہو-

اسلام آباد میں میڈیا سےگفتگو کرتے ہوئے امیر جماعت اسلامی کا کہنا تھا کہ پٹرول کی بڑھتی قیمتوں سے سب پریشان ہیں، پٹرول کی مد میں آٹھ ہزار ارب کا ٹیکس حاصل کیا جا رہا ہے، حکومت عوام کیساتھ بد دیانتی کر رہی ہے ایک لیٹر پر 130 روپے ٹیکس اور 80 روپے لیوی ہے، آئی ایم ایف ہر پلان میں زرعی ٹیکس لگانے کا مطالبہ کرتا ہے ، زرعی ٹیکس ان پر لگنا چاہئے جس کے پاس سو ایکڑ سے زائد زمین ہو،اگر حکومت لیوی کے معاملے پر پیچھے نہیں ہٹتی تو جما عت اسلامی آگے بڑھے گی، لیوی ختم کردی جائے تو پیٹرولیم مصنوعات کی قیمتیں 200 سے 250 روپے تک آ سکتی ہیں۔

حافظ نعیم نے کہا کہ کل پشاور میں عوام کا جم غفیر آیا تھا، دھرنوں میں تاجر، علماء، نوجوان سول سوسائٹی کے افراد آ رہے ہیں، آج لاہور جاؤں گا اور دھرنا دوبارہ جوائن کروں گا، لاہور کے بعد کراچی اور دیگر شہروں میں احتجاجی کیمپ بھی لگائیں گے، جماعت اسلامی کے پاس اسلام آباد آنے کا آپشن بھی موجود ہے ، پورے ملک سے پیدل مارچ کرتے ہوئے لوگ اسلام آباد آئیں گے،حکومت نے ہمیں اسلام آباد آ کر مذاکرات کی دعوت دی لیکن ہم نے دھرنے میں مذاکرات کیلئے کا کہا ہے۔