نائب وزیراعظم و وزیر خارجہ اسحاق ڈار نے اقوام متحدہ کی جنرل اسمبلی کے 81ویں اجلاس سمیت آئندہ کثیرالجہتی سفارتی سرگرمیوں کے لیے جامع اور بھرپور تیاریوں کی ہدایت کردی۔
نائب وزیراعظم کی زیرِ صدارت آئندہ کثیرالجہتی سفارتی سرگرمیوں کی تیاریوں سے متعلق اجلاس ہوا، جس میں جنرل اسمبلی کے اجلاس سمیت اہم عالمی سرگرمیوں کے حوالے سے پاکستان کی ترجیحات اور حکمت عملی کا جائزہ لیا گیا۔
سیکریٹری خارجہ نے اجلاس کو اقوام متحدہ کی جنرل اسمبلی کے اجلاس کی تیاریوں اور آئندہ سفارتی سرگرمیوں کے اہم پہلوؤں پر بریفنگ دی، جبکہ اسحاق ڈار نے پاکستان کی ترجیحات کے حوالے سے متعلقہ حکام کو ضروری رہنمائی فراہم کی،اسحاق ڈار نے تمام متعلقہ اداروں کو جامع تیاری اور مؤثر رابطہ کاری یقینی بنانے کی ہدایت کرتے ہوئے کہا کہ آئندہ کثیرالجہتی سفارتی سرگرمیوں کے دوران پاکستان کی ترجیحات کو مؤثر انداز میں اجاگر کیا جائے گا۔
واضح رہے کہ اقوام متحدہ کی جنرل اسمبلی کا 81 واں اجلاس 8 ستمبر 2026 سے نیویارک میں شروع ہو رہا ہے۔ جبکہ ہفتہ وار اعلیٰ سطحی عام بحث کا آغاز 22 ستمبر سے 28 ستمبر تک جاری رہے گا 81 ویں اجلاس کی صدرات جنرل اسمبلی کے صدر خلیل الرحمٰن کریں گے جنکا تعلق بنگلہ دیش سے ہے۔
جنرل اسمبلی کے 81 ویں اجلاس کے مقررین ممالک کی پہلی عارضی فہرست جاری کر دی گئی ہے۔ جسکے مطابق پاکستان کے وزیراعظم میاں شہباز شریف بروز جمعہ، 25 ستمبر کو جنرل اسمبلی کے اجلاس سے خطاب کریں گے۔ رواں سال عبوری فہرست میں پاکستان کا خطاب دوسرے سیشن (سہ پہر 3 تا رات 9بجے) رکھا گیا ہے۔
جنرل اسمبلی کی برسوں سے جاری روایت کے مطابق اقوام متحدہ کے سیکرٹری جنرل کے افتتاحی خطاب کے بعد اجلاس کے پہلے مقرر برازیل کے صدر ہوں گے جبکہ دوسری تقریر میزبان ملک امریکہ کے صدر ڈونلڈ ٹرمپ کی ہو گی۔
جاری ہونے والی عارضی فہرست میں بھارت کی جانب سے 25 ستمبر کو خطاب کے لیے فی الحال اسکے (ہیڈ آف گورنمنٹ) وزیراعظم کا نام دیا گیا ہے۔ تاہم حسب معمول زیادہ توقع اس بات کی ہے کہ مقررین کی فائنل لسٹ میں بھارت کے وزیرخارجہ کا نام آ جائے گا۔
رواں سال جنرل اسمبلی سے خطاب کرنے والے زیادہ تر مقررین موسمیاتی تبدیلی، عالمی صحت، امن و سلامتی جیسے عالمی مسائل پر تقاریر کے دوران انکے حل کے لیے اپنی تجاویز دیں گے،193 عالمی رہنما (یو این جی اے۔ 81) اجلاس کے دوران اقوام متحدہ کے نئے سیکرٹری جنرل کا چناؤ بھی کریں گے۔ نئے سیکرٹری جنرل کی دوڑ میں اس وقت 5خواتین امیدواروں سمیت8 امیدوار میدان میں ہیں۔