امریکی رئیلٹی ٹی وی اسٹار کِم زولشیاک کے 15 سالہ بیٹے کے جے بیئرمین کے خلاف جنسی حملے اور دیگر سنگین الزامات کے مقدمے میں جارجیا کی گرینڈ جیوری نے فردِ جرم عائد کردی۔
عدالتی دستاویزات کے مطابق کے جے بیئرمین پر مجموعی طور پر 7 الزامات عائد کیے گئے ہیں، جن میں کم عمر بچے سے سنگین نوعیت کی جنسی بدسلوکی، سنگین جنسی حملہ، مبینہ غیر رضامندی پر مبنی جنسی حرکات اور کسی شخص کو غیر قانونی طور پر حراست میں رکھنے کا الزام شامل ہے۔دستاویزات کے مطابق یہ الزامات 23 اپریل کو 16 سال سے کم عمر ایک متاثرہ فرد کے ساتھ مبینہ واقعے سے متعلق ہیں۔ تاہم، زیرِ سماعت مقدمے میں عائد الزامات ابھی ثابت نہیں ہوئے اور بیئرمین کو قانون کے تحت بے گناہ تصور کیا جاتا ہے جب تک عدالت میں جرم ثابت نہ ہوجائے۔رپورٹ کے مطابق بیئرمین کو 17 اگست کو جارجیا کے الفاریٹا میں ایک فٹنس سینٹر سے متعلق شکایت کے بعد گرفتار کیا گیا تھا۔ ایک خاتون ہم جماعت نے الزام عائد کیا تھا کہ نوجوان نے اس کی مرضی کے خلاف جنسی زیادتی کی کوشش کی۔
بیئرمین کے وکیل جیسن شیفیلڈ نے اپنے مؤکل کے خلاف الزامات کی تردید کرتے ہوئے کہا ہے کہ وہ ’’100 فیصد بے گناہ‘‘ ہے۔ وکیل کے مطابق بیئرمین نے پولیس کو ایسے شواہد پیش کرنے کی کوشش کی جن میں پولی گراف ٹیسٹ بھی شامل تھا، جبکہ دفاع کا دعویٰ ہے کہ مبینہ متاثرہ لڑکی کی جانب سے ماضی میں بھی غلط الزامات عائد کیے گئے تھے۔فردِ جرم عائد ہونے سے ایک روز قبل بیئرمین کے وکیل نے عدالت میں نوجوان کی رہائی کی درخواست بھی دائر کی تھی۔ وکیل نے مؤقف اختیار کیا کہ وہ ایک اچھا طالب علم ہے، اسکول میں اس کا ریکارڈ بہتر ہے، فٹبال کھیلتا ہے اور اسے تعلیمی وظائف کی پیشکشیں بھی موصول ہوئی ہیں۔
کِم زولشیاک نے بھی اپنے بیٹے پر عائد الزامات کو مسترد کرتے ہوئے انہیں ’’انتہائی تشویشناک اور غیر ذمہ دارانہ‘‘ قرار دیا تھا۔ ان کے نمائندے کے مطابق بیئرمین نے مبینہ متاثرہ خاتون کے ساتھ کسی بھی قسم کے ایسے فعل میں ملوث ہونے سے مکمل طور پر انکار کیا ہے۔زولشیاک نے عوام سے اپیل کی کہ وہ غیر ثابت شدہ الزامات پھیلانے کے بجائے قانونی کارروائی مکمل ہونے کا انتظار کریں۔