یوم دفاع پر مزار قائد کے گارڈز کی ذمہ داری فضائیہ کے کیڈٹس کے سپرد

ملک بھر میں آج یومِ دفاعِ وشہدا بھرپور قومی جوش و جذبے کے ساتھ منایا جا رہا ہے۔

آج سے 61 سال قبل پاک فوج اور پاکستانی قوم نے رات کی تاریکی میں حملہ آور ہونے والے دشمن کو ناکوں چنے چبوا دیے تھے اپنے سے کئی گنا بڑے دشمن کو منہ توڑ جواب دینے کی یہ روایت پچھلے سال مئی میں بھی دُہرائی گئی۔

جنگ ستمبر 1965 کی یاد میں یومِ دفاعِ وشہدا آج منایا جا رہا ہے، جس کیلئے کراچی میں مزارِ قائد پر خصوصی تقریب کا بھی اہتمام کیا گیا پاکستان ائیر فورس کے کیڈٹس نے مزارقائد پرگارڈز کے فرائض سنبھال لیے جبکہ ائیرکمانڈنگ پی اے ایف اکیڈمی اصغرخان ائیر وائس مارشل حسن فیصل تقریب کے مہمان خصوصی رہے۔

تقریب کے مہمان خصوصی یئر کمانڈنگ پی اے ایف اکیڈمی اصغر خان اور ایئر وائس مارشل حسن فیصل تھے، جنہوں نے مزار قائد پر حاضری دی۔ تقریب میں ملکی دفاع کے لیے جانوں کا نذرانہ پیش کرنے والے شہداء کو خراج عقیدت پیش کیا گیا۔

تقریب سے خطاب کرتے ہوئے ایئر وائس مارشل حسن فیصل نے کہا کہ پاک فضائیہ نے ہر مشکل گھڑی میں قوم کی توقعات پر پورا اترنے کی کوشش کی اور ملکی فضائی حدود کے دفاع کے لیے پوری طرح پرعزم ہے گزشتہ سال بھارتی جارحیت کے موقع پر بھی پاک فضائیہ نے بھرپور جواب دیا۔ سربراہ پاک فضائیہ کی قیادت میں جدید دفاعی نظام اور صلاحیتوں کے ذریعے ملک کے دفاع کو مزید مضبوط بنایا گیا ہے۔

ایئر وائس مارشل حسن فیصل نے شہدائے وطن کو خراجِ عقیدت پیش کرتے ہوئے کہا کہ پاکستان امن کا خواہاں ملک ہے، تاہم ملکی خودمختاری اور قومی سلامتی پر کسی صورت سمجھوتہ نہیں کیا جائے گا۔

یوم دفاع ہر سال 6 ستمبر کو 1965 کی جنگ میں پاک فوج اور پاکستانی قوم کی جانب سے دشمن کے خلاف بھرپور مزاحمت اور قربانیوں کی یاد میں منایا جاتا ہے، 61 برس قبل دشمن نے رات کی تاریکی میں پاکستان پر حملہ کیا، تاہم پاکستانی افواج اور قوم نے اس جارحیت کا ڈٹ کر مقابلہ کیا۔

پاکستانی قوم نے دفاع وطن کی یہ روایت گزشتہ سال مئی میں بھی دہرائی، جب بھارتی جارحیت کے مقابل پاک افواج نے بھرپور جواب دیا یوم دفاع و شہداء کے موقع پر ملک بھر میں مختلف تقریبات کا انعقاد کیا جا رہا ہے، جن میں شہداء اور غازیوں کی قربانیوں کو خراج عقیدت پیش کیا جا رہا ہے۔