یومِ دفاع و شہدا کے موقع پر عسکری قیادت نے شہدا کو خراج عقیدت پیش کرتے ہوئے کہا ہے کہ پاکستان کی مسلح افواج ملکی خودمختاری، علاقائی سالمیت اور قومی مفادات کے دفاع کے لیے مکمل طور پر تیار ہیں، کسی بھی جارحیت کا فوری اور فیصلہ کن جواب دیا جائے گا۔
آئی ایس پی آر کے مطابق 6 ستمبر قومی اتحاد، عزم اور شجاعت کی لازوال علامت ہے، جب 1965 کی جنگ کے دوران پاکستانی قوم نے وطن کے دفاع کے لیے متحد ہوکر دشمن کا مقابلہ کیا، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، چیف آف نیول اسٹاف ایڈمرل نوید اشر ف، چیف آف ایئر اسٹاف ایئر چیف مارشل ظہیر احمد بابر سدھو، کمانڈر نیشنل اسٹریٹجک کمانڈ جنرل سید عامر رضا اور مسلح افواج نے پاکستان کے شہدا کو خراج عقید ت پیش کیا۔
آئی ایس پی آر کے مطابق عسکری قیادت نے غازیوں اور شہدا کے اہل خانہ کے لیے بھی گہری عقیدت اور تشکر کا اظہار کیا شہدا نے میدان جنگ، فضا اور سمندر میں وطن کے دفاع کے لیے اپنی جانوں کا نذرانہ پیش کیا اور ان کی قربانیاں قومی تاریخ کا ناقابل فراموش حصہ ہیں، شہدا کی قربانیوں کی میراث آنے والی نسلوں کے لیے حوصلے کا باعث ہے، جبکہ شہدا کے اہل خانہ عزم، حوصلے اور ثابت قدمی کی علامت ہیں۔
آئی ایس پی آر کے مطابق مسلح افواج نے غازیوں کو بھی خراج تحسین پیش کیا جنہوں نے بہادری، ثابت قدمی اور فرض شناسی کے ساتھ ملکی سرحدوں کی حفاظت کی، پاکستان خطے میں امن، استحکام اور خوشحالی کا خواہاں ہے اور ذمہ دارانہ رویے اور پرامن بقائے باہمی کے لیے پرعزم ہے، تاہم اس عزم کو کمزوری نہ سمجھا جائے، پاکستان کے خلاف کسی بھی جارحیت کا فوری اور فیصلہ کن جواب دیا جائے گا۔
مسلح افواج نے پاکستان اور عوام سے غیر متزلزل وابستگی کا عزم کرتے ہوئے کہا کہ شہدا کی عظیم قربانیاں، غازیوں کا جذبہ اور اہلخانہ کی استقامت قومی طاقت ہیں،مسلح افواج قومی ذمہ داریاں پیشہ ورانہ مہارت اور غیرمتزلزل عزم سے ادا کرتی رہیں گی، پاکستان کی مسلح افواج زندہ باد، پاکستان ہمیشہ پائندہ باد۔