بھارتی دارالحکومت نئی دہلی میں نجی ہاسٹل کی 5 منزلہ عمارت گرنے سے 7 طلبہ ہلاک ہوگئے۔
بھارتی حکام کے مطابق جنوبی دلی میں نجی ہاسٹل کی عمارت گرنے کے بعد ریسکیو آپریشن کے دوران مزید 2لاشیں نکال لی گئیں جس کے بعد ہلاک ہونے والوں کی تعداد7 ہوگئی،ریسکیو آپریشن کے دوران اب تک 11 افراد کو بچا لیا گیا ہے جب کہ تقریباً 30 سے 50 طلبہ کے ملبے کے نیچے پھنسے ہونے کا خدشہ ہے جن کی تلاش جاری ہے ۔
بھارتی میڈیا کے مطابق عمارت میں زیادہ تر طلبہ رہائش پذیر تھے، جبکہ ملبے تلے 25 سے 30 بچوں کے پھنسے ہونے کا خدشہ بھی ظاہر کیا گیا ہے، منہدم ہونے والی خستہ حال عمارت تقریباً 50 سال پرانی تھی متاثرین کے اہل خانہ نے الزام عائد کیا ہے کہ عمارت حکام کی نااہلی اور عدم توجہی کے باعث منہدم ہوئی حادثے کے بعد ملحقہ عمارت کو بھی منہدم ہونے کے خدشے کے پیش نظر خالی کرا لیا گیا ہے۔
بھارتی حکام کے مطابق عمارت کے تہہ خانے میں پانی جمع ہونے اور وہاں مرمتی کام حادثے کی وجہ بنا،دوسری جانب سوشل میڈیا پر ہاسٹل کی عمارت گرنے کی سی سی ٹی وی بھی سامنے آئی ہے جس میں ایک دکاندار کو عمارت کے گرنے کے بعد فرار ہوتے ہوئے دیکھا گیا۔